Բացել լրահոսը Փակել լրահոսը
A A
Քաղաքականություն

Մարտի 1-ի իրադարձություններից տուժածներն աջակցություն կստանան. օրենքի նախագիծն ընդունվեց

Ազգային ժողովը շարունակում է նիստերի աշխատանքները: Հաշվի առնելով, որ 7-րդ գումարման երկրորդ նստաշրջանի 2019 թվականի ապրիլի 16-ին գումարված նիստերի օրակարգային հարցերը չեն սպառվել, քառօրյա նիստերը շարունակվում են մինչև օրակարգի սպառում:

 

...................

Ազգային ժողովն առաջին ընթերցմամբ ընդունեց «2008 թվականի մարտի 1-ից 2-ը Երևան քաղաքում տեղի ունեցած իրադարձությունների ժամանակ տուժած անձանց աջակցության մասին» օրենքի նախագիծը։

Մինչ քվեարկությունը վարման կարգով խոսեց ԲՀԿ խմբակցության պատգամավոր, ԱԺ փոխխոսնակ Վահե Էնֆիաջյանը, ով նշեց, որ կողմ են քվեարկելու։ «Մարտի մեկը ցավ է բոլորիս համար, ԲՀԿ-ն իր ներկայացուցիչներով բազմաթիվ առիթներ է ունեցել՝ քննադատելու և պահանջելու համակողմանի, խորքային քննություն և բոլոր մեղավորների պատիժը»,-ասաց նա։

Նախագիծն առաջին ընթերցմամբ ընդունվեց միաձայն՝ 117 կողմ քվեարկությամբ։

Նշենք, որ նախագծով սահմանվում է, որ աջակցություն ստանալու իրավունք ունի՝ նշված գործողությունների ժամանակ ստացած վնասվածքի պատճառով զոհված (մահացած) անձի՝ ՀՀ քրեական դատավարության օրենսգրքով նախատեսված կարգով իրավահաջորդի կարգավիճակ ունեցող անձը, ինչպես նաև այն անձը, որի առողջությանը նշված գործողությունների ժամանակ պատճառվել է ծանր կամ միջին ծանրության վնաս:

Աջակցության ձևը, չափը և տրամադրման կարգը, ինչպես նաև աջակցության տրամադրման համար դիմումի ձևը, կցվող փաստաթղթերի ցանկը և քննարկման կարգը սահմանվում են Կառավարության որոշմամբ: