«Միայն հերոսի հատկանիշներ ունեցող դատավորը այս փուլում կարող է կայացնել օբյեկտիվ որոշում». Ռոբերտ Քոչարյան (տեսանյութ)
Աջակցիր «Ա1+»-ինՎերաքննիչ դատարանի որոշումը անսպասելի չի եղել Ռոբերտ Քոչարյանի համար: «Այս գործով միայն հերոսի հատկանիշներ ունեցող դատավորը այս փուլում կարող է կայացնել օբյեկտիվ որոշում»,- ելույթում նշել է նախկին նախագահը:
Ապրիլի 11-ին Վերաքննիչ դատարանը մերժեց Ռոբերտ Քոչարյանի պաշտպանական կողմի բողոքը առաջին ատյանի դատարանի՝ պաշտոնաթող նախագահի կալանքի ժամկետը երկու ամսով երկարաձգելու որոշման դեմ: Ռոբերտ Քոչարյանի պաշտպան Հայկ Ալումյանը Վերաքննիչ դատարանի որոշումը բնորոշում է որպես ծայրահեղ խախտում:
«Շատ կոպիտ ձևով Վերաքննիչ դատարանը խախտեց Քրեական դաշտավարության օրենսգրքի բազմաթիվ նորմեր, որոնց վրա մենք հիմնվում էինք, որովհետև մեր յուրաքանչյուր փաստարկը բավարար էր, որ պարոն Քոչարյանը երեկ ազատ արձակվեր»,- նշեց փաստաբանը:
Երեկ դատարանում Ռոբերտ Քոչարյանը ելույթ ունենալով նշել է, որ դատարանի որոշումը անսպասելի չէր: Պաշտպանը մեջբերեց նախկին նախագահի արձագանքը իր ազատ արձակվելու դեմ որոշմանը:
«Նախկին նախագահը ասաց, որ մենք չենք կարող ակնկալել, որ դատավորը այս գործով պիտի նաև հերոս լինի, իսկ այս գործով միայն հերոսի հատկանիշներ ունեցող դատավորը այս փուլում կարող է կայացնել օբյեկտիվ որոշում»:
Պաշտպանական խմբի ներկայացուցիչը նշեց, որ գիտեն, թե ում միջոցով են դատարանին պատվեր տալիս: Պաշտպանը չցանկացավ մեկնաբանել թե խոսքը ում մասին է: Նա հավելեց, որ ժամանակը կգա և անուն առ անուն կհնչեցնեն անունները:
«Այնպես չի որ այս ամեն ինչը լինելու է միշտ քողարկված: Այս ամեն ինչը մի օր բացահայտվելու է, այս ամեն ինչը մի օր ստանալու է օրինական ընթացք և օրինական լուծում»:
Ինչ վերաբերում է, Ռոբերտ Քոչարյանին իր հարազատների հետ տեսակցությանը, ապա Հայկ Ալումյանը փաստեց՝ ապրիլի 3-ին 2,5 տարեկան թոռնիկին և իր մորը չի թույլատրվել տեսակցել Ռոբերտ Քոչարյանին:
«Հետագայում, ապրիլի 4-ին Հատուկ քննչական ծառայության քննիչն ասել է, որ ինքը պատրաստ է թույլատրել թոռնիկի տեսակցությունը պարոն Քոչարյանի հետ»:
Պաշտպանը հավելեց, որ, այնուամենայնիվ, թոռնիկը մինչև այսօր չի տեսակցել Ռոբերտ Քոչարյանին, կապված՝ թե ամիսը քանի անգամ կարող են տեսակցություններ լինել:
