«ՊԱՏԱՍԽԱՆԱՏՎՈՒԹՅԱՆ ԶԳԱՑՈՒՄՆ Է ՈՒՇԱՑՆՈՒՄ ՈՐՈՇՈՒՄԸ»
Աջակցիր «Ա1+»-ինԱյս շաբաթվա վերջում պարզ կլինի, թե ում է սատարելու Րաֆֆի Հովհաննիսյանի գլխավորած «Ժառանգություն» կուսակցությունը: Մինչ այդ զրուցել ենք կուսակցության վարչության անդամ, «ժառանգության» պատգամավոր Վարդան Խաչատրյանի հետ:
-Վերջնական որոշում այս պահի դրությամբ ընդունված չի: Ես շեշտում եմ, որ այս պահի դրությամբ, որովհետեւ շատ տարափոփոխ է վիճակը եւ որեւէ կողմանորշման մասին խոսելն այսօր դեռեւս վաղ է:
-Բայց ի՞նչով է պայմանավորված ձեր անորոշությունը, չէ՞ որ արդեն հայտնի են նախագահի թեկնածուների դիրքորոշումները, նախընտրական ծրագրերը եւ անելիքները:
-Ընդհանրապես բանակցային գործընթացն իր մեջ ներառում է երկրի ապագայի տեսլականի քննարկումները:
-Բայց չէ՞ որ երկրի ապագայի տեսլականի վերաբերյալ դիրքորոշումը չի փոխվելու 5 կամ 10 օր հետո:
-Դժվար է ասել, փոխվելու է, թե ոչ, որովհետեւ ամեն դեպքում փորձում ենք ընդհանուր հայտարարի գալ, որովհետեւ ինքնանպատակ չեն ընտրությունները: Մարդիկ համարում են, որ դրանք ինքնանպատակ են, եւ այսօր վճռվում է ինչ-որ բան, որի ուղղությամբ ջանքերը կենտրոնացնում են. մեզ համար միայն դա չի, եւ ինչ-որ չափով պայմանավորված է նրանով, որ մենք բուն ընտրական գործընթացների մեջ թեկնածուի բացակայության պատճառով այդպիսի ակտիվություն չունենք: Մեզ հետաքրքրում է մեր երկրի ապագան: Ուրիշ կողմնորոշումներ՝ շահադիտական բնույթի, «Ժառանգությունը» երբեք չի դրսեւորել: Մեր կարծիքով, կարեւորագույն խնդիրը կողմնորոշման համար հենց ապագայի տեսլականի վերաբերյալ է:
-Շարունակվո՞ւմ են բանակցությունները ԱԺՄ, ՕԵԿ, ՀՅԴ-ի Տեր-Պետրոսյանին սատարող ուժերի հետ:
-Այո, բանակցային գործընթացը շարունակվում է:
-Հնարավո՞ր է, որ առաջին արտգործնախարարը սատարի Առաջին նախագահին ընտրություններում:
-Ես որեւէ տարբերակ չէի ցանկանա բացառել, մենք ընդդիմադիր ուժ ենք, եւ այդ տեսակետից միանշանակ է, որ ընդդիմության թեկնածուները մեզ համար ավելի ընդունելի են, քան թե բուն իշխանության թեկնածուն, որի իշխանության գործունեությունը մի անգամ չէ, որ խնդրահարույց է եղել եւ բարձրացվել է մեր կողմից՝ հատկապես մարդու իրավունքների հետ կապված:
-Կա՞ մի բան, որը կբացառեք: Օրինակ` Սերժ Սարգսյանին սատարելը:
-Ես համարում եմ, որ հենց դա կարելի է բացառել, որովհետեւ անհասկանալի կլինի, որ ընդդիմադիր դաշտի ուժը սատար կանգնի իշխանության թեկնածուին:
-Իսկ Դաշնակցության հետ բանակցություններն ի՞նչ փուլում են: Հնարավո՞ր է, որ աջակցեք ՀՅԴ թեկնածուին:
-Առայժմ կոնկրետ որոշում չկա, դա պայմանավորված է ընդհանուր հայտարարի գալով՝ երկրի ապագայի հետ կախված նրա տեղ գտնելիք տեղաշարժերի, փոփոխությունների եւ համահասարակական բնույթի պոզիտիվ գործողությունների:
-Այսինքն, կարծում եք, որ առաջիկա 20 օրվա ընթացքում կարո՞ղ է այնպիսի լուրջ բան փոխվել, որ ազդի ձեր նախընտրությունների վրա:
-Ինչքան լուրջ բան կփոխվի՝ չգիտեմ: Բայց մի բան կա, դա չի լինի սատարում, դա կլինի կողմերի՝ «Ժառանգության» եւ մյուս կողմի, ում հետ եկել ենք որոշակի պարզ հիմքի, այս կողմերի միջեւ կկնքվի մեմորանդումով, որն իր մեջ կպարունակի նաեւ ընդհանուր դիրքորոշումների վեկտորը՝ ուժագիծը:
-Դուք ծանոթ եք բոլոր թեկնածուների ծրագրերին: Կա՞ մի թեկնածուի մոտ ծրագրային դրույթ, որին դուք սկզբունքորեն դեմ եք: Օրինակ, Տեր-Պետրոսյանի՝ հարեւանների հետ բարիդրացիական հարաբերություններ հաստատելու գաղափարին:
-Բարիդրացիական հարաբերությունները հարեւանների հետ միշտ էլ ցանկալի բան է, որովհետեւ ոչ մենք եք թռչելու լուսին, ոչ մեր հարեւանները, եւ ցանակալի է ունենալ բարիդրացիական հարաբերություններ, սակայն մեր կարեւորագույն հիմնախնդիրները լուծելուց հետո միայն եւ ոչ դրանց հաշվին, որովհետեւ կարող ենք ընկնել ծայրահեղությունների մեջ:
-Կա՞ արմատական առումով անհամապատասխանությունն եւ անհամատեղելիություն, որը կարող է խոչընդոտ հանդիսանալ այդ ուժին աջակցելու հարցում:
-Առայժմ բացարձակ անհամապատասխանության դրույթի դեռեւս չենք հանդիպել:
-Կոնկրետ թեկնածուի՞ մոտ, թե՞ ընդհանրապես:
-Ընդհանրապես: Կա գիտակցումը, որ «Ժառանգության» սատարումը ցանկալի է այն ուժի համար, որը ձգտում է հաջողել այս գործում եւ պետք է նշեմ, որ մեր գործընկերների կողմից կա ըմբռնում եւ հարգալից վերաբերմունք եւ չկա նյարդայնություն՝ մեր որոշման ուշացման հետ կապված, որովհետեւ բոլորն էլ հասնակում են, որ սա ժամանակավոր կացարան չի, որ փորձում ենք կառուցել: Մենք ամեն դեպքում խիստ լուրջ, հիմնավոր մոտեցում ենք ուզում պարզած լինենք եւ պատասխանատվությունը ժողովրդի առաջ կրենք լիարժեք: Չենք կարող միջանկյալ որոշումների գալ, այսօր սատարել, իսկ վաղը, ժողովրդի առաջ պատասխանատվության շրանակում երեւա, որ մենք թույլ ենք տվել ինչ-որ տատանումներ, որոնք կարող են բերել համահասարակական բացասական ելեւէջների:
Զրուցեց Դիանա Մարկոսյանը:
