Կրկին « Գարդասիլի» մասին. ԱՆ-ը չի նահանջելու (տեսանյութ)
«Գարդասիլ» դեղամիջոցի պատվաստումների դեմ աղմուկը զարմացնում է ԱՆ Մայրական եւ վերարտադրողական առողջության պահպանման բաժնի պետ Գայանե Ավագյանին: Նա չի հասկանում, թե մեր հասարակությունը ինչու չկարողացավ ընկալել այդ պատվաստման նշանակությունը: «Արգանդի պարանոցի քաղցկեղըն աշխարհում միակ քաղցկեղն է, որը հնարավոր է կանխարգելել: Դրա դեմ պատվաստումը կարող է հետագայում իրենց աղջիկներին զերծ պահել արգանդի պարանոցի քաղցկեղով հիվանդանալու դժվար, ծանր ախտաբանությունից»,- ասում է Գայանե Ավագյանը։ Հայաստանում տարեկան մինչեւ արգանդի պարանոցի քաղցկեղի 260 դեպք է արձանագրվում. «Հետեւաբար այդ դեպքերի 50-60 տոկոսը հայտնաբերվում է 3-4-րդ փուլերում, երբ արդեն բժշկությունը դառնում է անզոր՝ փրկելու այդ կանանց կյանքը: Տարեկան շուրջ 70-80 կին մահանում է արգանդի պարանոցի քաղցկեղից»: Ըստ նրա՝ այսօր պապիլոմա վիրուսի պատվաստումը միակ պատվաստումն է, որը կանխարգելում է արգանդի պարանոցի քաղցկեղի առաջացումը։ «Եվրոպական բոլոր երկրները, Կանադան, Միացյալ Նահանգներն ընդունել են այս պատվաստման գաղափարը, եւ մենք պետք է բոլորս միասին կարողանանք հաղթահարել այդ ֆոբիան, որը կա այս պատվաստանյութի նկատմամբ»,-նշեց Առողջապահության նախարարության աշխատակիցը: Ազգային ուռուցքաբանության կենտրոնի փոխտնօրեն Գագիկ Բազիկյանը վստահ է, որ աշխարհի 70 երկրների առողջապահության նախարարություններն իրենց երկրների կանանց եւ աղջիկների նկատմամբ վատություն չէին անի՝ ընդունելով «Գարդասիլ» դեղամիջոցը: «Մենք ինչո՞ւ ենք հրաժարվում մի քանի հոգու ֆեյքային նորությունները առաջ բերելով: Եթե գիտական է հիմնավորումը կարող ենք նստել եւ քննարկել, բայց եթե գիտական չէ»,-ասաց պարոն Բազիկյանը՝ որպես բժիշկ ներկայացնելով արգանդի պարանոցի քաղքցկեղով հիվանդ կնոջ տառապանքը՝մահվանից առաջ, որպեսզի հասարակությունը հասկանա, թե ինչու է պետք կանխարգելել քաղցկեղը։
