Օլե-Գունար Սուլշեր. «Մանչեսթեր Յունայթեդը» վերադարձավ իրական աշխարհ
Անգլիական «Մանչեսթեր Յունայթեդի» գլխավոր մարզիչ Օլե-Գունար Սուլշերն այսպես է մեկնաբանել իր թիմի պարտությունը Փարիզի «ՊՍԺ»-ից ՈՒԵՖԱ-ի չեմպիոնների լիգայի 1/8 եզրափակիչ առաջին խաղում: Հանդիպումն ավարտվել է 2:0 հաշվով՝ հօգուտ ֆրանսիական ակումբի: «Մենք նման մակարդակի խաղեր քիչ ենք ունեցել վերջին ժամանակներում: Առջեւում դեռ շատ անելիքներ ունենք: Բայց չպետք է մտածենք, որ ամեն ինչ արդեն ավարտված է: Կփորձենք բարելավել մեր խաղը մինչեւ պատասխան հանդիպումը: Սակայն այսօր «Մանչեսթեր Յունայթեդը» վերադարձավ իրական աշխարհ», - ՈՒԵՖԱ-ի պաշտոնական կայքին հայտնել է Օլե-Գունար Սուլշերը: Հավելենք, որ սա «Մանչեսթեր Յունայթեդի» կրած առաջին պարտությունն է այն բանից հետո, երբ նորվեգացի մասնագետը գլխավոր մարզչի պաշտոնում փոխարինել է պաշտոնանկ եղած Ժոզե Մոուրինյոյին: Մինչ այս հանդիպումը թիմը նրա ղեկավարությամբ տարել էր 10 հաղթանակ, մեկ խաղ ավարտել ոչ-ոքի:
