Ծանոթացեք. աշխարհի չեմպիոն Ֆրանսիայի հավաքական
Ֆուտբոլի աշխարհի նորընծա չեմպիոն Ֆրանսիայի հավաքականն առաջին հերթին առանձնանում է իր բազմազգությամբ:
Պարզվում է, որ աշխարհի առաջնությանը հայտավորված 23 ֆուտբոլիստներից 17-ը ընդհանրապես ֆրասիական արմատներ չունեն, իսկ 3-ը կիսով չափ են ֆրանսիացի: Օրինակ, Ռաֆայել Վարանի հայրը Մարտինիկայից է, իսկ Տոմ Լեմարինը՝ Գվադելուպայից: Դարպասապահ Ուգո Լյորիսը կատալոնյան արմատներ ունի: Անտուան Գրիզմանի մայրը ծագումով Պորտուգալիայից է: Իսկ ահա Պոլ Պոգբայի եղբայրն հանդես է գալիս նույնիսկ Գվինեայի ազգային թիմում: Այնպես որ, Ֆրանսիայի հավաքականում մաքուր ֆրանսիացի կարելի է համարել Բենժամին Պավարին, Ֆլորիան Տովենին ու Օլիվյե Ժիրուին:
Ինչ վերաբերում է ակումբային պատկանելիությանը, ապա աշխարհի նորընծա չեմպիոնները հանդես են գալիս միայն եվրոպական 5 առաջատար երկրների առաջնություններում.
Ֆրանսիայի Լիգա 1՝ 9 ֆուտբոլիստ
Իսպանիայի Լա լիգա՝ 6
Անգլիայի Պրեմիեր լիգա՝ 5
Գերմանիայի բունդեսլիգա՝ 2
Իտալիայի Ա սերիա՝ 1
Ֆրանսիայի հավաքականը միջին տարիքով աշխարհի առաջնության ամենաերիտասարդ թիմերի մեջ զբաղեցնում էր 6-րդ տեղը՝ 26,4 տարեկան:
Հավաքականի գլխավոր մարզիչ Դիդյե Դեշամը հայտնի է նրանով, որ նա 1998 թվականին Ֆրանսիայի հավաքականի կազմում դարձել է աշխարհի չեմպիոն: Նա բրազիլացի Մարիո Զագալոյից եւ գերմանացի Ֆրանց Բեկենբաուերից հետո դարձավ երրորդ ֆուտբոլիստը, որը ֆուտբոլի աշխարհի չեմպիոն դարձավ նաեւ որպես մարզիչ:
