Երևանի կենտրոնի բակերից մեկում բարձրահարկ շենք են կառուցում. ահազանգ (տեսանյութ)
Աբովյան 13, 11 եւ Թումանյան 30 հասցեի վեցհարկանի շենքերի բնակիչները կանգնել են փաստի առաջ: Բակում 12 հարկանի բարձրահարկն է վեր խոյանալու: «Մենք լուսնից չենք իջել, գիտենք, որ մի բան ասում են, մի այլ բան կառուցում: Այդպես չի լինի: Տվեք մեզ փաստաթղթերը, որ մենք կարողանանք համապատասխան ատյանների դիմել: Դրա մեղավորը քաղաքապետարանն է: Շինարարության մեղավորը այդքան կառուցապատողը չէ, որքան քաղաքապետարանը, որը մեզ այդպիսի պատասխաններ է տալիս»,- ասում է շենքի բնակիչներից Աշոտ Ամիրզադյանը: Բնակիչներն ասում են՝ իրենց կարծիքը հաշվի չի առնվել։ Կառուցապատման մասին էլ գլխի են ընկել, երբ բակի կանաչ տարածքը ցանկապատվել է: «Քաղաքապետարանը որոշում էր ընդունել, որ այլեւս կենտրոնում որեւէ շինարարություն չպետք է լինի, ո՞ւր է: Ինչու մեզ չեն հարցնում, ինչքան կարող է ժողովուրդը ապրի ցեմենտի ու բետոնի մեջ: Այսքան կտորը մենք ինքներս ենք մեր ձեռքով ջրել, սարքել»,- ասում է Լիզա Մանասյանը, իսկ Ստեփան Սարգսյանն էլ ավելացնում է. « Եթե քաղաքապետը այս շենքի բնակիչ լիներ, արդյո՞ք նա դրական կընդուներ այս երեւույթը, բոլոր նորմաները խախտվում են»: Տարածքի սեփականատերն ու կառուցապատողը ոստիկանության պաշտոնաթող գնդապետ Ղևոնդ Ղալումյանն է, որի անունը մամուլում նախկինում շրջանառվել է երկու քրեական գործերով: Նրա ներկայացուցիչ Գագիկ Հակոբջանյանը նշում է, որ 1217 քմ տարածքը գնվել է դեռ 2010 թ-ին: Բնակիչները սեփականատիրոջ ներկայացուցչից փաստաթուղթ էին պահանջում, որ գնել է նաեւ այգու տարածքը: Նա չի բացառում, որ ծառեր են հատվելու։ «Շինարարության մեջ լինում են նման դեպքեր, բնականաբար հետագայում դա վերականգնելու պայմանով»: Յանա Դարյանը հակադարձում է. «Ինչպես կարելի է մի ամբողջ այգի քոքահան անել, ինչ ա կռան պետք է դնեն: Հետո ասում են ծառ կտնկենք: 50 տարի է պետք, մինչեւ այսպիսի ծառեր դառնան»: Բնակիչներն արդեն գծագրի միջոցով փորձեցին հասկանալ, արդյո՞ք տարածքի սեփականատերն իրավունք ունի հատել ծառեր: Երեւանի կենտրոնի բնակիչները զարմանում են, թե ինչպես է այստեղ շինարարություն իրականացվելու, երբ բակում նույնիսկ իրենց մեքենաների համար կայանելու տեղ չկա: Բնակիչները որոշել են դատական կարգով վերականգնել իրենց խախտված իրավունքները: Իսկ մինչ այդ, թույլ չեն տալու շինտեխնիկայի մուտքը իրենց բակ: