Անհարմար եմ զգում, որ այս երկրում եմ ապրում. իրավապաշտպան (տեսանյութ)
Շուշիի առանձնակի գումարտակի հրամանատար Ժիրայր Սեֆիլյանի եւ մյուսների գործով դատավճռից հետո իրավապաշտպան Ավետիք Իշխանյանը խորը հիասթափություն է ապրել: «Երբ իմացա դատավճիռը... ես այդպիսի վատ զգացողություն չեմ ունեցել, ինչպես երեկ: Ես անհարմար եմ զգում, որ այս երկրում եմ ապրում»,- ասաց Ավետիք Իշխանյանը: Ժիրայր Սեֆիլյանը երեկ դատապարտվեց 10 տարի 5 ամիս ժամկետով ազատազրկման, չնայած պաշտպանական կողմը պնդում էր՝ որեւէ ապացույց չկար նրա դեմ: Առաջին աստիճանի Մարտական խաչի շքանշանակիր Սեֆիլյանի գործը իրավապաշտպանին 1937 թիվն է հիշեցնում: «1937 թ-ին առանց որեւէ մասնակցության, առանց որեւէ ինչի՝ մարդկանց մեղադրանք էին առաջադրում: Դրա համար էր ինձ համար ավելի մեծ շոկ, քան մինչ այդ եղած քաղաքական բանտարկյալները»,- ավելացնում է Հայաստանի Հելսինկյան կոմիտեի նախագահ Ավետիք Իշխանյանը: Նրա խոսքերով՝ այսօր բոլոր քաղաքական եւ քաղաքացիական միավորները պետք է համախմբվեն եւ հայտարարություններով հանդես գան: Առայժ հայտարարությամբ հանդես են եկել «Երկիր Ծիրանի» եւ «Ժառանգություն» կուսակցությունները. «Ավելին, ես կասեմ այն քաղաքական ուժերը, կուսակցությունները , որոնք իրենց համարում են ընդդիմադիր եւ ոչ իշխանական, եթե լռեն, ուրեմն նրանք մասնակից են հանցագործությանը»,- եզրափակեց Ավետիք Իշխանյանը: https://youtu.be/OR_PcftGTeM
