«Ոչ ոք տեղյակ չէ, թե համայնքի հողը ինչպե՞ս է վաճառվում եւ ո՞ւմ» (տեսանյութ)
Հողերի աճուրդ-վաճառքն այլեւս փակ չի իրականացվի: Սահմանադրական դատարանը հունվարի 30-ին բավարարել է «Հետաքննող լրագրողներ» հասարակական կազմակերպության հայցը, եւ հակասող ու անվավեր ճանաչել ՀՀ հողային օրենսգրքի 68-րդ հոդվածի 6-րդ մասը, որով համայնքային հողերի փակ աճուրդ-վաճառք էր սահմանված: Հողերի վաճառքը փակ իրականացնելը կադաստրի ղեկավարների նախաձեռնությամբ է եղել: Համայնքներում հիմնական վաճառվող գույքը հենց հողն է, ոչ ոք տեղյակ չէր, թե համայնքապատկան հողը ինչպե՞ս է վաճառվում եւ ո՞ւմ, ասում է հետաքննող լրագրող Սառա Պետրոսյանը: ԱԺ «Ելք» խմբակցության պատգամավոր Արտակ Զեյնալյանի կարծիքով, ցանկացած շահագրգիռ անձ պետք է կարողանա ներկա գտնվել աճուրդին, դիտարկել այն եւ լուսաբանել: «Սահմանադրական դատարանն այս առումով՝ հաստատել է իր արդյունավետ պաշտպանության միջոց լինելու հանգամանքը: Այս դատական ակտը չափազանց կարեւոր է»: Արտակ Զեյնալյանը նշում է, որ նման հարցերը պետք է լուծում ստանան հենց առաջին ատյանի դատարանում եւ չհասնեն Սահմանադրական դատարան: «4 տարի ենք ծախսել, ռեսուրսներ ենք վատնել եւ դեռ վնասի հատուցում պետք է վճարի Հայաստանի Հանրապետությունն այս խախտումների համար»: Փաստաբան Արա Ղազարյանի կարծիքով ՍԴ-ի որոշումը ազատ խոսքի վերաբերյալ որոշում է: «Նրանք, ովքեր ցանկանում են համայնքի հողերը էժան վաճառել կոռուպցիոն եղանակով, կտրում են խոսքի ազատության ճանապարհը եւ թույլ չեն տալիս լրագրողին կամ այլ շահագրգիռ անձի տեսնել, թե ի՞նչ խախտումներով է հողը կոպեկի գնով վաճառվում»: Այս ոլորտում մասսայական կոռուպցիա է, օրենքի խախտում եւ ՍԴ-ն շտկեց այդ սխալը, եզրափակեց Արա Ղազարյանը:
