«Իշխանությունները նորմալ գործ չեն կարողանում սարքել» (տեսանյութ)
«Սասնա ծռեր»-ին օժանդակելու մեջ մեղադրվող Կարո Եղնուկյանի ընտանիքի հանդեպ ակնհայտ ընդգծված վատ վերաբերմունք է դրսեւորվում: Այսօր լրագրողների հետ հանդիպման ժամանակ նրա պաշտպան Տիգրան Հայրապետյանն ընդգծեց, որ սա ոչ թե մի օրվա, այլ չորս տարվա ընդգծված վերաբերմունք է ընտանիքի անդամների նկատմամբ: Ընտանիքի անդամների նկատմամբ վերջին ճնշումը եղավ այն ժամանակ, երբ նրանք Հայաստան- Սփյուռք համաժողովից առաջ ցանկացել էին տեղեկացնել, որ սփյուռքահայեր Կարո Եղնուկյանը եւ Ժիրայր Սեֆիլյանը կալանավորված են իրենց քաղաքական հայացքների համար: Սակայն ընտանիքի անդամներին դա չի հաջողվել, միանգամից բերման էին ենթարկել ոստիկանության Կենտրոնի բաժին: «Բաժնում խառնաշփոթ էր տիրում, առանձին սենյակներում բոլորիս նստեցրին: Միայն անձնական տվյալներ էին ճշտում, մեկը մյուսի վրա էր գոռում: Այդ ժամանակ ՄԻՊ ներկայացուցիչները մոտեցան, եւ միայն 4 ժամ անց ընթերականեր բերեցին: Ես դրսից եմ իմացել, որ այլ պատրվակով էին բերել՝ պայթուցիկ նյութ կրելու կասկածանքով»,- ասաց Կարո Եղնուկյանի կինը՝ Ռուզաննա Եղնուկյանը: Նրա խոսքերով՝ եթե իրենց բերման էին ենթարկում պայթուցիկ նյութ կրելու կասկածանքով, ինչու հենց սկզբից խուզարկություն չեն արել: «Եթե այսպիսի գործողությունների են գնում, չեմ զարմանա, որ տանիքից, մեքենայից ինչ – որ բան գտնեն»: Իսկ Կարո Եղնուկյանի աղջիկը՝ Էլմոնեն էլ ավելացրեց, որ չորս ժամ հետո երբ իրեն ցանկացել են խուզարկել, ոստիկանության ներկայացուցիչը պարզապես հարցրել է. «Բալիկ ջան, չստուգեմ ներքնազգեստդ, ի՞նչ արգելված իր ունես»: Կարո Եղնուկյանի մյուս պաշտպանը՝ Նինա Կարապետյանցն էլ ավելացրեց, որ որեւէ տրամաբանություն չկա երեխաներին եւ ընտանիքին բերման ենթարկելու մեջ: «Այնքան ապաշնորհ են մեր իշխանությունները, որ նորմալ գործ չեն կարողանում սարքել, այս աստիճանի բացահայտ հետապնդում է»,- ասաց Հելսինկյան ասոցիացիայի նախագահը: Բերման ենթարկելու բարոյական վնասի փոխհատուցման համար դիմում է ներկայացվել Վարչական դատարան: Ինչպես նաեւ հաղորդում է ներկայացվել Գլխավոր դատախազին: