Կալանավորին համոզել են չդիմել հացադուլի
10 տարի 8 ամիս կալանավայրում իր պատիժը կրող Ռոման Գեւորգյանին նույնիսկ ՔԿՀ վարչությունն է մերժել: Ինչպես «Ա1+»-ին հայտնեց «Կոշ» ՔԿՀ-ում իր պատիժը կրողը, վարչությունը ոչ նպատակահարմար է գտել իր պատժի կրման տեսակը բաց ռեժիմով փոխարինելու դիմումը: Նա մերժումն այսօր է ստացել: Հիշեցնենք, որ անկախ հանձնաժողովի կողմից վաղաժամկետ ազատ արձակումը մերժելուց հետո «Կոշ» ՔԿՀ-ի ղեկավարությունը դիմել էր Քրեակատարողական վարչություն՝ պատժի կրման տեսակը բաց ռեժիմով փոխարինելու համար: Ռոման Գեւորգյանը նաեւ տեղեկացրեց, որ դիմումը ստանալուց հետո այսօրվանից մտադիր է անժամկետ հացադուլ եւ ջրադուլ սկսել, մինչեւ իր հարցին լուծում չտրվի: Բողոքի ծայրահեղ քայլից նրան հետ չի պահում նաեւ առողջական բազմաթիվ խնդիրներ ունենալը: Ավազակային հարձակման համար 12 տարվա ազատազրկման դատապարտված Ռոման Գեւորգյանին տանը սպասում են հաշմանդամություն ունեցող Արցախյան պատերազմի մասնակից հայրը, հղի կինը եւ երեք անչափահաս երեխաները: Նրա պաշտպան Արա Զաքարյանն էլ «Ա1+»-ին փոխանցեց, որ հերթական անգամ Ռոման Գեւորգյանը դարձել է կամայականության զոհ. «Մի դեպքում ուրիշներին բաց են թողնում, իսկ նրա ռեժիմը հրաժարվում են փոխել»: Պաշտպանը նշեց, որ բարձրաձայնելու են այս ամենի մասին եւ ցույց են տալու, թե ինչպես է կոռուպցիան ծաղկում Քրեակատարողական վարչությունում: Ավելի ուշ Արա Զաքարյանին ու հարազատներին հաջողվել է համոզել Ռոման Գևորգյանին՝ հրաժարվել հացադուլի մտքից, քանի որ առողջական լուրջ խնդիրներ ունի ու 2 օրից պետք է բժշկական հետազոտության ենթարկվի։
