Նախարարի բանակցություններից հետո 50 մլն դրամի սպիրտ է գնվել (տեսանյութ)
Նախորդ տարի հանրապետությունում 21 միլիարդ դրամի պտուղ ու բանջարեղեն է մթերվել, հունվարի 1-ի դրությամբ պարտքը կազմել է 1 մլրդ 660 մլն դրամ, իսկ այսօր՝ 187 մլն դրամ է: Այսօր լրագրողների հետ հանդիպման ժամանակ տեղեկացրեց Գյուղատնտեսության փոխնախարար Ռոբերտ Մակարյանը: Քաղցրաշենի եւ հարակից գյուղերի բնակիչների պարտքերը մարելու խնդրով էլ անձամբ հետաքրքրված է Գյուղատնտեսության նախարար Իգնատի Առաքելյանը: «Նախարարը բանակցություններ վարեց Շահնազարյան ընկերության ղեկավարության հետ: Շուրջ 50 մլն դրամի սպիրտ Շահնազարյան ընկերությունը գնեց Վինար ընկերությունից։ Անցած շաբաթ մարվել է Քաղցրաշենի եւ մնացած գյուղացիների 50 մլն դրամի չափով պարտքը»,- ասաց Ռոբերտ Մակարյանը: Փոխնախարարը նաեւ տեղեկացրեց, որ այս շաբաթ օրվանից կվերաբացվեն գյուղատնտեսական տոնավաճառները եւ պայմանները լինելու են նույնը, ինչ նախորդ տարիներին: Ֆերմերներին շուկայի տարածքը եւ կշեռքը կտրամադրվի անվճար, ինչպես եղել է նախորդ տարիներին: Ռոբերտ Մակարյանը նաեւ ավելացրեց, որ ողջ ընթացքը վերահսկելու են ոստիկանները:
