«Եթե դուք քիչ եք, չի նշանակում, որ դուք ճիշտ եք» (տեսանյութ)
6-րդ գումարման ԱԺ-ում այսօր մինչ Պետաիրավական եւ մարդու իրավունքների պաշտպանության հարցերի մշտական հանձնաժողովի նախագահի պաշտանում ՀՀԿ կողմից առաջադրված Հրայր Թովմասյանը ելույթ կունենար, ԱԺ փոխխոսնակ Էդուարդ Շարմազանովը հայտարարեց, որ ԱՄՆ Տեխաս նահանգը ճանաչել է Հայոց ցեղասպանությունը, ինչը հատակապես Վաշինգտոնում տեղի ունեցած վերջին հայտնի դեպքերից հետո հատկապես կարեւոր էին: Դահլիճը սկսեց ծափահարել: Իսկ Հրայր Թովմասյանն իր ելույթում նշեց, որ հետեւելով մշտական հանձնաժողովների նախագահների պաշտոններում առաջադրված թեկնածուների ելույթներին, հասկացել է, որ ինքը միակն է, որ պատգամավորի փորձ չունի, ըստ այդմ էլ՝ իր խոսքը մի փոքր կտարբերվի: Այդ պատառով էլ նա հայտարարեց, որ հակիրճ է խոսելու, քանի որ լավ տիրապետում է ոլորտին եւ պատրաստ է առավոտից երեկո աշխատել նախագծերի վրա, քանի որ որպես իրավաբան՝ իրեն հաճելի է աշխատել այդ ոլորտում. «Յուրաքանչյուրի կարծիքը լսված է լինելու ու քննարկվելու է»: Նրանք հարց ուղղեց ՀՅԴ պատգամավոր Արմենուհի Կյուրեղյանը՝ նշելով՝ արդյոք ժամանակը չէ հաջորդ ընտրություններին անցնել ոչ թե մարզային, այլ համապետական ռեյտինգային համակարգի կամ ընդհանրապես ազատվել այդ համակարգից: Ի պատասխան Հրայր Թովմասյանը նշեց, որ այդ հարցերը իրեն՝ որպես հանձնաժողովի նախագահի, ուղղված չպետք է լինեն, քանի որ հանձնաժողովի նախագահը օրենսդրական նախաձեռնության իրավունք չունի. «Իսկ որպես պատգամավոր՝ ասեմ, որ ես ու իմ մի քանի գործընկերներն ենք այդ համակարգի հեղինակները, ու չեմ կիսում ձեր մոտեցումները, քանի որ այս համակարգի շնորհիվ մանդատները համամասնորեն են բաշխվել: Ինչպես բնության մեջ, այնպես էլ այստեղ պայքարը ոչ միայն միջտեսակային է, այլեւ ներտեսակային է: Միգուցե ներտեսակային պայքարը խորթ էր մեզ համար, սակայն այնուամենայնիվ ընդունելի էր»: Արմենուհի Կյուրեղյանը նկատեց՝ այո, բառերը փոխվել են, սակայն իրականության մեջ դրանք հիշեցնում են մեծամասնական համակարգը. «Ձեւը փոխելով՝ բովանդակությունը չի փոխվել»: Հրայր Թովմասյանը հակադրվեց՝ ասելով՝ միգուցե հիշեցնում են մեծամասնական համակարգ, սակայն դրանք այդպիսին չեն: «Շատ ակտիվ եք, պարոն Թովմասյան»,- կատակեց ԱԺ փոխխոսնակ Էդուարդ Շարմազանովը: Իսկ ՀՀԿ պատգամավոր Մարգարիտ Եսայանը, մինչ հարց ձեւակերպելը, հայտարարեց՝ չի կասկածում, որ Հրայր Թովմասյանն ընտրվելու է մշտական հանձնաժողովի նախագահ. «Երեկ ամբողջ օրը խոսվում էր լուծարված Մարդու իրավունքների հարցերի մշտական հանձնաժողովի մասին, ես միտումնավոր չխոսեցի, քանի որ հանձնաժողովում ես պատասխանատու պաշտոն եմ զբաղեցրել՝ տեղակալ: Հանձնաժողովը բավականին ակտիվ է եղել ու ցավով եմ արձանագրում, որ այն լուծարվեց, ի տարբերություն շատ հանձնաժողովների, որ ոչ մի հարց չեն քննարկել, սակայն այսօր լինելու են: Խնդրանք ունեմ, որ երբեք չստորադասվի մարդու իրավունքների հարցերը պետաիրավականին»: Հրայր Թովմասյանը վստահեցրեց, որ որեւէ հանձնաժողով մյուսին չի ստորադասվում, երբ միաձուլումներ են լինում: Ելք դաշինքի պատգամավոր Արտակ Զեյնալյանը մի նկատառում արեց իր հարցադրման մեջ՝ եթե ՀՀԿ-ն թվաքանակով ԱԺ-ում շատ է, դա չի նշանակում, որ ճիշտ են: Նա նաեւ հիշեցրեց, որ հատկապես կրթական ոլորտում արմատավորված է համակարգված ընտրակաշառքը, ինչպե՞ս է Հրայր Թովմասյանը պայքարելու դրա դեմ: Ի պատասխան Հրայր Թովմասյանը նախ պատասխանեց 2-րդ հարցին՝ ասելով՝ այդ հարցում մեծ դերակատարում ունի հասարակության քաղաքական, իրավական կուլտուրան մեծ նշանակություն ունի. «Ինչ վերաբերում է առաջին հարցին, ապա ձեր ասածից էլ չի բխում, որ դուք քիչ եք, ուրեմն դուք ճիշտ եք: Այսինքն, եւ փոքրամասնությունը կարող է ճիշտ լինել, եւ մեծամասնությունը»:
