Գյուղացին է որոշելու, թե ինչ գյուղտեխնիկա գնի
Դիզվառելիքի սուբսիդավորման ծրագիրը այլևս չի իրականացվելու. խնայված գումարները ուղղվելու են լիզինգով տրամադրվող գյուղտեխնիկայի սուբսիդավորմանը: Այդ մասին փետրվարի 28-ին հայտնեց ՀՀ գյուղատնտեսության նախարար Իգնատի Առաքելյանը Երևանում կայացած «Ֆերմերային կոնգրես» -ին: Միջոցառումը կազմակերպել է Օքսֆամի հայաստանյան գրասենյակը՝ Հայաստանի գյուղատնտեսական դաշինքի հետ համատեղ: Նրա խոսքով, դիզվառելիքի սուբսիդավորումը այլևս նպատակահարմար չէ շարունակել, քանի որ դրա իրականացումից ստացած արդյունքը չարդարացրեց ակնկալիքները: Մինչդեռ, գումարները կարող են ուղղվել ավելի արդյունավետ ծրագրերի իրականացմանը։ «Ծրագիրը կհաստատվի 1-2 շաբաթվա ընթացքթում: Չի լինի սահմանափակում արտադրվող երկրի տեսանկյունից, այսինքն՝ գյուղացիներն են որոշելու, թե ինչ գյուղտեխնիկա են գնելու: Սա թույլ կտա ստեղծել մատչելի ֆինանսական գործիք և բազային հնարավորություն կտա ցանկացած գյուղատնտեսության՝ ձեռքբերել մատչելի գնով տեխնիկա»,- ասաց նախարարը: Կապված գյուղտեխնիկայի տեսակից, լիզինգը տրամադրվելու է 2-ից 3 տոկոս տարեկան տոկոսադրույքով, 3-ից 10 տարի մարման ժամկետով: Կանխավճարը կազմելու է 20 տոկոս : Գյուղնախարարը նաև տեղեկացրեց, որ այժմ մշակման փուլում է պարտադիր կաթիլային ոռոգման համակարգերի տեղադրման ծրագիրը, ինչը թույլ է տալիս տնտեսել ջրի ծախսերը, բարձրացնել բերքատվության քանակը և որակը: «Մենք հիմա մասնագիտացված ընկերությունների հետ հաշվարկ ենք անում, որպեսզի համապատասխան երկարաժամկետ ֆինանսական գործիք մշակվի այդ ծրագրի իրականացման համար»,- հավելեց նա: Նախարարի պնդմամբ, տնտեսվող գումարները նաև կուղղվեն այլ ծրագրերի իրականացմաը, մասնավորապես գարնանացան սերմերի և պարարտանյութի սուբսիդավորմանը:
