«Որոշ ԱԺ փորձագետների պատալոկը լինում է կոֆե եփելու ունակությունը» (տեսանյութ)
ԱԺ արտահերթ նիստին այսօր «ԱԺ կանոնակարգ» օրենքում փոփոխություններ կատարելու մասին նախագծի քննարկմանը ՀԱԿ պատգամավոր Գագիկ Ջհանգիրյանն իր ելույթում նշեց, որ սա հանգուցային ու գերկարեւոր օրենք է ու մեզ նման երկրի համար Սահմանադրությունից հետո, այն 2-րդ օրենքն է. «Սակայն այս օրենքը քննարկում ենք հոգնած, կիսադատարկ դահլիճում: Եթե հերոսանալու առիթ տար այս օրենքը, ապա ելույթ ունեցողների համար այստեղ տեղ չէր լինի»: Նրա մտահոգությունն այն է, որ նոր Սահմանադրության բոլոր դրույթները իրացվեն այս օրենքի մեջ: Իսկ ԲՀԿ խմբակցության ղեկավար Նաիրա Զոհրաբյանն իր ելույթում իր դժգոհությունը հայտնեց, որ նման կարեւոր նախագծի քննարկմանը դահլիճը կիսադատարկ է: Նա կողմ է նախագծի այն դրույթին, որ խմբակցության ղեկավարը կարող է համապատասխան լիազորագրով քվեարկել պատգամավորի փոխարեն. «Իհարկե, բացառությամբ այն դեպքերի, երբ պատգամավորը նստած է վետերոկում կամ սաունայում սուզված է, խմբակցության ղեկավարին այս դեպքում իրավասություն տալ՝ իր փոխարեն քվեարկելու: Եթե պատգամավորը ԱԺ կողմից պաշտոնական գործուղման է, փակ ծրարով իր քվեարկությունը հանձնի քարտուղարությանը, քանի որ որեւէ երաշխիք չկա, որ խմբակցության ղեկավարը հետագայում ինչ-ինչ խնդիրների առաջ չի կանգնի ու լինի խոսակցություն՝ ես այսպես եմ ասել, դու՝ այնպես ես արել»: Նա նաեւ ընդգծեց, որ պատգամավորի աշխատանքի համար շատ կարեւոր է փորձագետների աշխատանքը. «Եվրոպական որեւէ երկրում չեք տեսնի, որ պատգամավորը նստած օրենք է գրում. նա տալիս է գաղափարը, իսկ փորձագիտական խումբն աշխատում է դրա վրա: Իսկ մեր ԱԺ փորձագետներից շատերի դեպքում տեսնում ես, որ պատալոկը լինում է կոֆե էփելու ունակությունը: ԱԺ-ն չի վճարում նրանց այն բանի համար, թե էսպրեսսո՞ն են լավ եփում, թե՞ թուրքական սուրճը՝ զրո առնչություն պատգամավորական գործունեությանը: Այստեղ էլ դնենք ֆիլտրեր»:
