«Իսկ ո՞վ է ասում, որ կան քաղբանտարկյալներ». գլխավոր դատախազի թեկնածու (տեսանյութ)
ՊՊԾ գնդի գրավման արդյունքում սպանված երեք ոստիկանի մահվան մեջ մեղադրվողները «Սասնա ծռերից» են։ ՀՀ գլխավոր դատախազի թեկնածու Արթուր Դավթյանն ասում է. «Բավարար ապացույցների համակցությունն ապահովելու դեպքում մեղադրանքներ կառաջադրվեն: «Սասնա ծռերից» են: Բնականաբար»: Այս մարդն առաջին անգամ է լսում, որ «հաց բերող» Արթուր Սարգսյանը իր առաքելության ավարտից հետո փորձել է ՊՊԾ տարածքից դուրս գալ, սակայն նրա վրա իրավապահները կրակել են եւ խոչընդոտել. «Էդպիսի տեղեկություններ քննությունը չունի, ես չգիտեմ, որտեղից ձեզ էդ տեղեկությունը»: Կոնկրետ իրավիճակում, երբ Արթուր Սարգսյանը հաց էր հասցնում «Սասնա ծռերին», ըստ գլխավոր դատախազի միակ թեկնածուի, ՊՊԾ տարածքում սովից մեռնող մարդ չկար, հետեւաբար Արթուր Սարգսյանի արարքը որակվում է հանցագործություն. «Կոնկրետ անձը էսօրվա դրությամբ գտնվում է քրեակատարողական հիմնարկում ոչ հաց տանելու համար»: Այս մարդն այսօր Ազգային Ժողովում հանդիպում էր խմբակցությունների հետ եւ ներկայացնում իր տեսլականները որպես գլխավոր դատախազի միակ թեկնածու: Լրագրողներին հետաքրքրեց՝ իր օրոք Հայաստանը կազատվի՞ քաղբանտարկյալներից. «Քաղաքական պատճառով ձերբակալումներ չունենք մեր երկրում»: Բոլոր ընդդիմադիրներին ձերբակալելու եւ մեղադրելու որոշումներն, ըստ այս մարդու, կայացվում են բացառապես օրենքով, հետեւաբար ինքը չի կարող գոյություն չունեցող խնդիրները վերացնել. «Իսկ ո՞վ է ասում, որ կան քաղբանտարկյալներ, որ ես էլ ոչինչ չեմ փոխելու»: Ապագա գլխավոր դատախազը երկար չի մտածում ասելու համար, որ քրեական օրենսգրքում համապատասխան հանցանքների համար կան համապատասխան հոդվածներ: Եվ նա պատասխանում էր փողոց դուրս եկած քաղաքական գործիչներին նորից ձերբակալելու մասին հարցին:
