Պաշտպանին թույլ չեն տալիս տեսակցել Պավել Մանուկյանի հետ
«Էրեբունի» բժշկական կենտրոնի Վերակենդանացման բաժնում գտնվող Պավել Մանուկյանի պաշտպան Ինեսա Պետրոսյանին թույլ չեն տալիս տեսակցել նրա հետ. «Ասում են՝ պատասխանատուն այստեղ չէ եւ մեզ հանձնարարված է որեւէ մեկին ներս չթողնել: Հիմա ես վերակենդանացման բաժանմունքի դռների դիմաց կանգնած եմ»,- այս մասին «Ա1+»-ին ասաց պաշտպանը: Հիշեցնենք, որ երեկ ՊՊԾ տարածքում տեղի էր ունեցել փոխհրաձգություն, որի հետեւանքով Պավել Մանուկյանն ու նրա որդին՝ Արամը, ինչպես նաեւ մեկ ոստիկան վիրավորվել էր: Արամ Մանուկյանի նկատմամբ որպես խափանման միջոց է ընտրվել երկամսյա կալանքը եւ նա «Էրեբունի» բժշկական կենտրոնից տեղափոխվել է «Դատապարտյալների հիվանդանոց» ՔԿՀ, իսկ Պավել Մանուկյանի մասով դեռ դատարանի որոշում չկա: Պաշտպան Ինեսա Պետրոսյանը նշում է, որ քննիչը կալանքը որպես խափանման միջոց ընտրելու միջնորդությանը իրեն ծանոթացրել է, սակայն դիմել է դատարան, թե՝ ոչ, դեռ պարզ չէ: Ի դեպ, Պավել Մանուկյանը ցանկություն է հայտնել ներկա լինել դատական նիստին: