Երևանում ծաղիկներ են դրվում Ֆրանսիայի դեսպանատան դիմաց (տեսանյութ)
Ֆրանսիայի դեսպանատան մոտ առավոտից ծաղիկներ են դրվում՝ ի հիշատակ երեկ Ֆրանսիայի Նիս քաղաքում ահաբեկչական գործողությունների հետևանքով զոհված մարդկանց։
Դեսպանատան առջև հավաքվածները դատապարտում են երեկվա արյունալի դեպքերը։
Հավաքվածքների թվում կային նաև մարդիկ, որոնք պատրաստվում են մեկնել Ֆրանսիա։
«Վերջերս շատ-շատ են լինում նման դեպքեր Ֆրանսիայում։ Սրտի ցավով իմացա այդ մասին։ Հիմա մենք պատրաստվում ենք գնալ, բայց վախ ենք զգում»,- նշեց հավաքվածներից մի քաղաքացի, որի 2 որդիներն ու 6 թոռնիկներն այնտեղ են։
Երեկ՝ հուլիսի 14-ի երեկոյան՝ տեղական ժամանակով ժամը 22։30-ի սահմաններում, Նիսի Անգլիական ափին հավաքված մարդկանց խմբի մեջ մեծ արագությամբ բեռնատար էր մխրճվել։ Այնուհետև վարորդը կրակ էր բացել մարդկանց վրա։ Ոստիկանության գործողությունների արդյունքում վերջինս սպանվել է։ Բեռնատարի մեջ հայտնաբերվել է մեծ քանակությամբ զենք և պայթուցիկ։
Վերջին տեղեկությունների համաձայն՝ զոհվել է 84 մարդ, ավելի քան 18-ի վիճակը ծայրահեղ ծանր է։
