Ֆրանսիայի հավաքականն առաջին հաղթանակը տարավ Եվրո-2016-ում
Ֆուտբոլի Եվրոպայի առաջնության տանտերերը՝ Ֆրանսիայի ֆուտբոլիստները, բացման խաղում հաղթեցին Ռումինիայի ազգային թիմին:
Խաղը կայացավ Փարիզի Սեն Դենի արվարձանի «Ստադ դե Ֆրանս» մարզադաշտում: Նախ տեղի ունեցավ բացման արարողությունը, ապա խաղադաշտ մտան մրցակից թիմերը:
Առաջին խաղակեսում կողմերին չհաջողվեց գոլ խփել, սակայն ընդմիջումից 12 րոպե անց դաշտի տերերի հարձակվող Օլիվյե Ժիրուն բացեց հաշիվը՝ դառնալով առաջնության անդրանիկ գոլի հեղինակը: Ութ րոպե անց ռումինացիները 11մ հարվածի իրավունք ստացան, որն անվրեպ իրացրեց Բոգդան Ստանչուն:
Խաղի ելքը վճռվեց նախավերջին րոպեին, երբ ֆրանսիացիների ֆուտբոլիստ Դիմիտրի Պայեն անսպասելի հարվածով գրավեց ռումինացիների դարպասի վերին անկյունը: Քիչ անց Ֆրանսիայի հավաքականի գլխավոր մարզիչը փոխարինեց հանդիպման հերոսին, որը հուզմունքից չկարողացավ զսպել ուրախության արցունքները:
Այդպիսով, Ֆրանսիայի հավաքականն առաջին հաղթանակը տարավ առաջնությունում եւ գլխավորեց Ա խմբի աղյուսակը:
