«Ամոթ է 21-րդ դարում ունենալ քաղբանտարկյալ» (տեսանյութ)
ԱԺ մարդու իրավունքների պաշտպանության եւ հանրային հարցերի մշտական հանձնաժողովն այսօր անցկացրեց խորհրդարանական լսումներ՝ «ՀՀ կողմից ԵԽԽՎ «Քաղաքական բանտարկյալի սահմանումը» թիվ 1900 բանաձեւի կատարման վերաբերյալ» թեմայով: ԱԺ պատգամավոր, հանձնաժողովի անդամ Ալեքսանդր Արզումանյանն իր ելույթում նշեց, որ ինքը որպես մի քանի անգամ քաղբանտարկյալ դարձած մարդ, քաջատեղյակ է խնդրին. «Զարմանալի է, որ դատախազության աշխատակիցները ոչ միայն անտեսում են իրենց հանձնաժողովի կողմից ուղարկված տարբեր բողոքները, այլեւ խուսափում են բաց ճակատով գալ ու խոսել այն խնդիրների մասին, որոնք առկա են: Քաղբանտարկյալների գործերի 95 տոկոսի սանկցիաները տվել է դատախազությունը եւ դատախազությունն է մշտապես հերքել քաղբանտարկյալների առկայությունը»: Ինչ վերաբերում է ՀՀ-ի ու Ադրբեջանի միջեւ համեմատությունների անցկացմանը, որ այնտեղ ավելի շատ են քաղբանտարկյալները, պարոն Արզումանյանը նշեց, որ ՀՀ-ի եւ Ադրբեջանի միջեւ կա սար ու ձորի տարբերություն. «Բայց եթե կա ցեղախումբ, որ մարդ է ուտում, մենք չենք կարող ասել, որ մենք մարդ չենք ուտում, կամ տարեկան մեկ մարդ ենք ուտում եւ ամոթ է՝ 21-րդ դարում ունենալ քաղբանտարկյալ: Այս պահին ՀՀ-ում կան քաղբանտարկյալներ»: Միաժամանակ, նա նշեց, որ այս պահի դրությամբ ԵԽԽՎ առաջ ստանձնած մեր պարտավորությունների կատարման առումով կա փոփոխություն՝ 150 քաղբանտարկյալի փոխարեն այժմ ունենք 15-ը. «Սակայն քանի դեռ կա գեթ մեկ քաղբանտարկյալ, մենք չենք կարող ասել, որ առաջընթաց ունենք»: Մինչ ԱԺ-ում խորհրդարանական լսումներ են, ԱԺ դարպասների մոտ են դատապարտված Շանթ Հարությունյանի, Վոլոդյա Ավետիսյանի եւ Հայկ Կյուրեղյանի հարազատներն ու իրավապաշտպան կազմակերպություններ: Նրանք եկել են պահանջելու ԱԺ-ից՝ ճանաչել նրանց քաղբանտարկյալ եւ ազատ արձակել: