Հայ գրողները վրդովված են Դավութօղլուի հայտարարություններից (տեսանյութ)
«Թուրքիան ծայրահեղ վիճակում է». այսօր լրագրողների հետ հանդիպմանը հայտարարեց վերջերս այդ երկրից վերադարձած գրող Արտեմ Հարությունյանը։ Նա մասնակցում էր բանաստեղծական մրցույթի, որտեղ շահել է լավագույն մրցանակը։ Պարոն Հարությունյանը ընդգծեց. «Այդ երկրում ներքին վիճակը չափազանց լարված է, փողոցներում ցույցեր էին: Ոստիկանությունը շներով ուղեկցում էր ամբոխին: Թուրքիայում սոցիալ-տնտեսական լուրջ անարդարություններ կան»,- ասաց նա՝ հավելելով, որ այս իրավիճակն անդրադառնում է նաև Հայոց ցեղասպանության խնդրին. «Թուրքիան մտադիր չէ որևէ կերպ ընդունել Հայոց ցեղասպանությունը: Իր ներքին խնդիրները հաշվի առնելով՝ այս երկիրը փորձում է սիրաշահել եվրոպական երկրներին և դիվիդենտներ շահել: Հիմա էլ Թուրքիան կազմակերպում և զինում է սիրիական ընդդիմադիրներին»: Գրող Մերուժան Տեր-Գուլանյանն էլ խոսեց Թուրքիայի արտգործնախարար Ահմեդ Դավութօղլուի վերջին հայտարարությունից, որտեղ նա ասել էր, թե հույս ունի՝ Հայաստանն ու հայկական սփյուռքը «համարձակ քայլեր» կձեռնարկեն, ինչպես արել է Թուրքիայի վարչապետ Ռեջեփ Թայիփ Էրդողանը՝ ներողություն խնդրելով կոտորված հայերից։ Գրողը նշեց, որ թուրք պաշտոնյան փորձում է խեղաթյուրել իրականությունը. «Եթե խնդրին ոչ այնքան իրազեկ որևէ մեկը կարդա այդ հայտարարությունները, կմտածի, որ Դավութօղլուն շատ հետաքրքիր և անվնաս հարց է բարձրաձայնում, հայերն են, որ չեն ուզում բանակցել, իրականում նրա բոլոր խոսքերը բացահայտ ստեր են: Սա ավելի շատ աշխարհին է ուղղված, քան մեզ։ Թուրքերը գիտեն, որ մենք սա չենք ընդունելու»,- ընդգծեց գրողը։
