«Մանկության աշխարհը» մեկնարկել է
Հագուստ, կոշկեղեն, խաղալիքներ, գրասենյակային եւ դպրոցական պարագաներ, նորածինների համար սնունդ, քաղցրավենիք, պաղպաղակ, զարգացող եւ ուսուցանող խաղեր, ուսումնական ձեռնարկներ եւ գրքեր։ Այս ամենն կարելի էր տեսնել այսօր մեկնարկած «Մանկության աշխարհ EXPO 2014 » խորագրով ցուցահանդեսի ժամանակ։ Ցուցահանդեսը նվիրված էր Երեխաների պաշտպանության միջազգային օրվան։ Այն արդեն 8-րդ անգամ կազմակերպում է Լոգոս Էքսպո ընկերությունը։ «Լոգոս Էքսպո»-ի գլխավոր տնօրեն Սուրեն Նազինյանը բացատրեց, թե ինչու են մեկ շաբաթ անց կազմակերպել միջոցառումը։ «Հունիսի 1-ին մենք ունենք շատ միջոցառումներ եւ կարծում ենք, որ երեխաների տոնը պետք է երկարացնենք»,- «Ա1+»-ին ասաց նա։ 60-ից ավելի ընկերություն է մասնակցում ցուցահանդեսին։ Ներկայացվել էին նաեւ «Զատիկ» մանկատան նախկին սաների աշխատանքները՝ հիմնականում տոնական, սիրահարական եւ մանկական բացիկներ։ Ցուցահանդեսը կտեւի մինչեւ հունիսի 9-ը։ Ողջ ընթացքում երեխաներին ուրախացնում էին հայտնի հեքիաթների հերոսները եւ պարային խմբերը։
