«Մեր մոտ խի վատ ա՞ վիճակը». Մհեր Սեդրակյան (տեսանյութ)
Յանուկովիչի հեռանալուց հետո ապարանցի պատգամավոր Լյովա Խաչատրյանի տրամադրությունը բարձրացել է, արդեն երգում է. «Հեռանա՜լ, ուզում եմ բայց չեմ կարող...»: Պատգամավորը կարծում է, որ Վիկտոր Յանուկովիչը խաբել է իր ժողովրդին` ինչ էր խոստանում եւ ինչ պարզվեց ամենավերջում. «Պայմանների խախտում ա եղել, ժողովուրդը նախագահ է ընտրել, պարզվել ա՝ նախագան ոսկե ունիտազներից ա օգտվել»: Հայաստանի ժողովուրդն էլ կարող է նույն ձեւով վարվել իր ղեկավարի հետ, եթե, պարզվի, որ վերջինիս զուգարանի ունիտազը նույնպես ոսկուց է. «Հայ ժողովուրդը նույնպիսի ժողովուրդ է, ինչպես Ուկրաինայում»: «Կարեւորը, որ ինչ լինում է, լինի ժողովրդի սրտով»,- ՀՀԿ խմբակցության անդամ Մանվել Գրիգորյանն է ասում՝ անդրադառնալով Յուլիա Տիմոշենկոյի աչքալուսանքին, ըստ որի՝ հետխորհրդային բոլոր երկրներն էլ ազատվելու են իրենց դիկտատորներից. «Եթե դիկտատորներից ազատվում են, ուրեմն լավ ա»: Երբ Ուկրաինայում նախագահը փախչում էր ժողովրդի դատաստանից, ՀՀԿ խմբակցության անդամ Մհեր Սեդրակյանն իր բառերով քաղաքում չէր, չգիտի, թե ինչ է կատարվում այնտեղ, եւ ինչ նմանություններ կան Հայաստանի եւ Ուկրաինայի միջեւ. «Մեր մոտ խի վատ ա՞ վիճակը»: Վերջինիս համար անսպասելի չէր, որ Յանուկովիչի կուսակիցները նրան մեղադրեցին ուկրաինացի ժողովրդի շահերը դավաճանելու եւ արյունահեղություն սարքելու մեջ. «Ըտենց ա լինում ընդհանրապես, էն որ ասում ա՝ էշը ընկնում ա, դանակավորը շատանում ա, հիմա Յանուկովիչինն ա»: «Գիտե՞ք ինչ կա»,-հանրապետականների առնետավազքի առիթով անընդհատ հակադարձում էր հանրապետական Վարդան Այվազյանը. «Հալվա ասելուց ոչ բերաններս է քաղցրանում, ոչ էլ դառնանում է»: Եթե Հայաստանում ստեղծվի նույն իրավիճակը, ինչ Ուկրաինայում, պարոն Այվազյանը չի կարծում, որ փողոց դուրս եկած ժողովուրդն աջ ու ձախ հանրապետական կփնտրի, որ ծեծի. «Մարդուն ծեծում են իր արարքների համար: Ես չեմ էլ վախենում իմ արարքների համար»: Իսկ միգուցե հանրապետականը հեռանա՞ քաղաքական թատերաբեմից՝ դրանով կանխելով հնարավոր բռնությունները: Հովհաննես Սահակյանն ասում է, որ իրականում լրագրողներն են փողի դիմաց գրգռում եւ սրում իրավիճակը. «Բազում խնդիրներ ունենք, լուսաբանումը եւ ներկայացնելը շատ ավելի մեծ նշանակություն ունեն, քանց թե բուն խնդիրը»: Ի դեպ, Հովհաննես Սահակյանն այն հանրապետականներից է, որն իրեն պատասխանատու է համարում Սերժ Սարգսյանի քաղաքական քայլերի համար, ինքը իր նախագահին մենակ չի թողնի. «Թռնողներն այլ տեղ են, մենք չենք թռնում»:
