Եվրադատարանը որոշում է կայացրել ընդդեմ Ադրբեջանի՝ ապրիլյան պատերազմում գլխատված հայ զինծառայողի գործով
Աջակցիր «Ա1+»-ինՄարդու իրավունքների եվրոպական դատարանը (ՄԻԵԴ) վճիռ է կայացրել հայաստանցի դիմումատուների օգտին՝ «Հ.Տ.-ն և այլք ընդդեմ Ադրբեջանի» գործով, որը վերաբերում է 2016 թվականի ապրիլյան պատերազմի ընթացքում ադրբեջանական ուժերի կողմից հայ զինծառայողի սպանության, խոշտանգման և գլխատման դեպքին։
Դիմողները՝ Վ.Տ.-ն, Լ.Վ.-ն և Ա.Գ.-ն, Արցախի բանակի մայոր Հ.Տ.-ի ծնողներն ու քույրն են: Հ.Տ.-ի մարմինը հայտնաբերվել էր 2016 թվականի ապրիլյան ռազմական բախումներից հետո՝ Թալիշ գյուղի մերձակայքում՝ շփման գծի մոտ:
Ըստ դիմողների ներկայացրած փաստերի և դատաբժշկական փորձաքննության՝ Հ.Տ.-ն ռազմական բեռնատարի դարանամուտ լինելու հետևանքով ստացել էր ծանր վիրավորում և ադրբեջանական ուժերի վերահսկողության տակ հայտնվելիս արդեն եղել է անպաշտպան ու մարտունակությունից զուրկ։ Դատաբժշկական եզրակացությունը հաստատել է սահմռկեցուցիչ փաստը՝ զինծառայողի ձեռքերը հատվել են դեռևս կենդանության օրոք, որից հետո նա ենթարկվել է գլխատման:
ՄԻԵԴ-ը արձանագրել է Մարդու իրավունքների եվրոպական կոնվենցիայի մի շարք կոպիտ խախտումներ Ադրբեջանի կողմից.
2-րդ հոդվածի խախտում (կյանքի իրավունք),
3-րդ հոդվածի խախտում (խոշտանգումների և անմարդկային կամ նվաստացուցիչ վերաբերմունքի արգելում)՝ ինչպես Հ.Տ.-ի նկատմամբ կիրառված խոշտանգումների, այնպես էլ դիմողների՝ ընտանիքի անդամների կրած անձնական տառապանքների մասով:
Դատարանն ընդգծել է, որ ընտանիքի անդամները ենթարկվել են ծայրահեղ հոգեկան տառապանքների՝ պայմանավորված սիրելիի մարմնի մասերի բացակայությամբ և պատշաճ հուղարկավորություն իրականացնելու անհնարինությամբ:
Դատարանը Ադրբեջանին պարտավորեցրել է վճռի վերջնական դառնալուց հետո երեք ամսվա ընթացքում վճարել արդարացի փոխհատուցում`
60,000 եվրո՝ համատեղ Հ.Տ.-ի ծնողներին (ոչ նյութական վնաս)
30,000 եվրո՝ նրա քրոջը (ոչ նյութական վնաս),
14,210 եվրո՝ դատական և այլ ծախսերի համար:
Հիշեցնենք, որ 2016 թվականի ապրիլի 5-ին հաստատված հրադադարից հետո կողմերը փոխանակել են զոհվածների մարմինները, և հայկական կողմը հաղորդել էր խեղանդամ՝ գլուխներից, ձեռքերից կամ ականջներից զրկված մարմինների վերադարձի մասին: Նմանատիպ պնդումներով ներկայումս քննության փուլում են ևս 21 գանգատներ:
