Ոսկեվազի բնակչի տանը 11 փաթեթ մարիխուանա կար
Աջակցիր «Ա1+»-ինՀամայնքային ոստիկանության Աշտարակի բաժնում ստացվել էր օպերատիվ տվյալ, որ Ոսկեվազ գյուղի բնակիչ 69-ամյա մի տղամարդ ապօրինի պահում և օգտագործում է մարիխուանա, իսկ տնամերձ հողամասում` աճեցնում կանեփ:
Օգոստոսի 5-ի առավոտյան տղամարդը ձերբակալվեց և տեղափոխվեց բաժին։
Արագածոտնի մարզային քննչական վարչությունում նախաձեռնվեց քրեական վարույթ, և օգոստոսի 5-ին Ոսկեվազի նրա տանն ու այգում կատարվեց զննություն: Հայտնաբերվեց կանեփի 58 թուփ, չոր կանեփի 15 բույս, նաև` թղթե 11 փաթեթ՝ լցված մարիխուանայի նմանվող զանգվածներով: Դրանց ընդհանուր քաշն ավելի քան 28 գրամ էր։
Ըստ տանտիրոջ` կանեփն ինքն էր աճեցրել, իսկ թմրանյութն անձնական օգտագործման համար էր:
Նախաքննությամբ հանգամանքները պարզվում են։
Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով:
