Տրանսպորտային տոմսային համակարգն ու նոր փոփոխությունները. փոխքաղաքապետի ասուլիսը. ՈՒՂԻՂ (տեսանյութ)
Աջակցիր «Ա1+»-ինԵրևանի տրանսպորտում թղթային QR տոմսերը դուրս են բերվել՝ տեխնիկական խնդիրները նվազեցնելու և բնապահպանական նկատառումներով
Օգոստոսի 1-ից Երևանի հանրային տրանսպորտում այլևս չեն կիրառվում թղթային QR կոդով ուղետոմսեր։ Քաղաքապետի տեղակալ Սուրեն Գրիգորյանը հայտարարել է, որ այս քայլը միտված է տեխնիկական խնդիրների նվազեցմանը և թղթի մեծաքանակ օգտագործումից խուսափելուն։
Փոխքաղաքապետի խոսքով՝ քաղաքացիները, որոնք նախկինում օգտվում էին թղթային QR տոմսերից, այժմ կարող են օգտվել տրանսպորտային քարտից, որը կարելի է պարբերաբար լիցքավորել և օգտագործել բոլոր տեսակի հանրային տրանսպորտում։
Նա խորհուրդ է տվել ուղևորներին նախապես ձեռք բերել ուղետոմսեր՝ խուսափելու համար վճարման պահին հնարավոր ձգձգումներից։ Մասնավորապես, եթե լիցքավորումը կատարվում է ուղևորության պահին (օրինակ՝ մետրոյի կայարանում), ապա համակարգում տվյալների մշակման համար պահանջվում է միջինը 2–5 րոպե։
Տրանսպորտային քարտերը հնարավոր է լիցքավորել «Թել-Սել» տերմինալների, դրամապանակ հավելվածի, ինչպես նաև transport.yerevan.am կայքի միջոցով։ Իսկ «Թել-Սել» դրամապանակի միջոցով տոմս գնելու դեպքում, դրանք անմիջապես հայտնվում են հավելվածում՝ գրանցված հեռախոսահամարի միջոցով։
Գրիգորյանը նշել է, որ նույնականացման գործընթացները «Թել-Սել»-ում նույնպես դյուրացվել են՝ նախորդ երկարատև հաստատման փոխարեն այժմ կիրառվում է ավտոմատացված մեխանիզմ, որը զգալիորեն արագացնում է ծառայությունների մատչումը։
Ներկայում հանրային տրանսպորտում գործում են վճարման երեք տարբերակ՝
-
Տրանսպորտային քարտ,
-
Անհպում բանկային քարտ (բացառությամբ ՎՏԲ-ի),
-
Բջջային հավելված («Թել-Սել» դրամապանակ)։
Փոխքաղաքապետը վստահեցրել է, որ նոր համակարգը բավականին արդյունավետ է, իսկ հնարավոր խնդիրները լուծվում են օպերատիվ կերպով՝ քաղաքապետարանի և «Թել-Սել»-ի աջակցության կենտրոնների միջոցով։
