ՀՀ տարածքը չի կարող օգտագործվել երրորդ պետությունների կողմից հարևան պետություններից որևէ մեկի դեմ ռազմական գործողություններ իրականացնելու համար.

Ուկրաինայի պաշտպանության նախարարության հետախուզության գլխավոր վարչությունը հայտնել էր, որ Ռուսաստանն ընդլայնում է իր ռազմական ներկայությունը Հայաստանում և արագացնում Գյումրիի իր ռազմաբազայի համալրումը Հայաստանի տարածքում՝ նշելով, որ դա տեղի է ունենում Ադրբեջանի հետ լարվածության ֆոնին։

Ուկրաինական հետախուզությունից հայտնել են, որ նպատակը Հարավային Կովկասի երկրների վրա ռազմաքաղաքական ճնշման ուժեղացումն է:

ԱԳՆ խոսնակ Անի Բադալյանը մեկնաբանել է մամուլում տարածված տեղեկությունները։ «Ի պատասխան մամուլում տեղ գտած որոշ մտացածին լուրերի՝ Հայաստանի Հանրապետությունը վերահաստատում է իր սկզբունքային դիրքորոշումը, որ ՀՀ տարածքը չի կարող օգտագործվել երրորդ պետությունների կողմից հարևան պետություններից որևէ մեկի դեմ ռազմական գործողություններ իրականացնելու համար»,-ասված է մեկնաբանության մեջ։