ՀՀ պետական վերահսկողական ծառայության լիազորությունների շրջանակներում իրականացված վերահսկողությունների արդյունքում՝ նախորդ 3 տարիների ընթացքում, Վարչապետին են ներկայացվել շուրջ ութ տասնյակ նախաձեռնությունների առաջարկներ՝ օրենսդրական և ենթաօրենսդրական ակտերում փոփոխություններ և լրացումներ կատարելու վերաբերյալ:

Վարչապետի կողմից տրված հանձնարարականների հիման վրա՝ պետական կառավարման համակարգի մի շարք մարմինների կողմից նախաձեռնվել են համապատասխան օրենսդրական փոփոխություններ, որոնք հանգեցրել են տարբեր ոլորտներում ինստիտուցիոնալ բարեփոխումների և պետական մարմինների գործունեության արդյունավետության բարձրացման:

ՀՀ պետական վերահսկողական ծառայության կողմից պետական մարմիններում իրականացված վերահսկողության միջոցով վեր են հանվում այնպիսի համակարգային խնդիրներ, որոնց լուծման համար անհրաժեշտություն է առաջանում գործող իրավակարգավորումներում իրականացնել լավարկումներ կամ սահմանել նոր իրավական կարգավորումներ՝ տվյալ մարմիններում առկա իրավական բացերը լրացնելու և ընթացակարգային խնդիրները լուծելու նպատակով:

ՊՎԾ կողմից նախորդ 3 տարիների ընթացքում իրականացված վերահսկողական գործառույթներից բխող նախաձեռնություններից առավել հատկանշանական են հետևյալ ոլորտներում կատարված փոփոխությունները.

ՀՀ էկոնոմիկայի նախարարությունում ՀՀ կառավարության 2015 թվականի հունվարի 30-ի որոշման համաձայն՝ ՀՀ տարածքից ԵԱՏՄ թանկարժեք մետաղների թափոնի և ջարդոնի (ավտոմեքենաների խլացուցիչների օգտագործված կատալիզատորների կերամիկական թափոնների) արտահանման լիցենզիաների տրամադրման գործընթացի օրինականության ուսումնասիրության արդյունքում արձանագրված խնդիրների կանոնակարգման վերաբերյալ Ծառայության առաջարկի հիման վրա, կառավարության որոշմամբ դրանց արտահանման գործընթացի նկատմամբ կիրառվել են սահմանափակումներ:

Նման կարգավորումը նպաստել է ՀՀ-ում շահագործվող ավտոմեքենաներից կատալիզատորները ապօրինաբար հանման և վաճառքի իրականացման արատավոր սովորույթի կանխմանը՝ այդպիսով նպաստելով թե՛ իրավական, և թե՛ բնապահպանական մի շարք խնդիրների լուծմանը:

Համայնքներին տրամադրվող դոտացիաների գումարների հաշվարկման և վճարման մեխանիզմների ճշգրտման նպատակով՝ ՊՎԾ կողմից կատարված ուսումնասիրությունների արդյունքում, Վարչապետին առաջարկվել է հանձնարարել համապատասխան լիազոր մարմիններին միջոցներ ձեռնարկել ավել վճարված դոտացիայի գումարները ՀՀ պետական բյուջե վերադարձնելու ուղղությամբ՝ բացառելով օրենդրական բացի հետևանքով ավել դոտացիաների տրամադրումը համայնքներին:

Ներկայացված առաջարկների արդյունքում «Ֆինանսական համահարթեցման մասին» ՀՀ օրենքում կատարվել են համապատասխան փոփոխություններ և լրացումներ:

Իրականացված փոփոխությունների շնորհիվ պետական բյուջեից համայնքներին տրամադրվող դոտացիաները հաշվարկվում են առավել ճշգրիտ և սահմանված իրավակարգավորումներին համապատասխան:

ՀՀ կառավարության 2018 թվականի ապրիլի 12-ի N 404-Ն որոշմամբ սահմանված զինվորական ծառայության համար քաղաքացու կամ զինծառայողի պիտանիության աստիճանը որոշող հիվանդությունների ցանկի համապատասխան հոդվածով սահմանված հիվանդության առկայությամբ պայմանավորված, Ծառայության կողմից իրականացված ուսումնասիրությունների արդյունքում արձանագրվել է պարտադիր զինվորական ծառայությունից ազատումների կտրուկ աճ:

ՀՀ կառավարության 2018 թվականի ապրիլի 12-ի N 404-Ն որոշման մեջ Ծառայության առաջարկով կատարվել են փոփոխություններ և լրացումներ, համաձայն որոնց՝ զորակոչիկների գլխուղեղում հայտնաբերվող նորագոյացությունները (կիստաները), անկախ իրենց չափերից, խոչընդոտ չեն հանդիսանում զինվորական ծառայության զորակոչվելու համար, եթե դրանք չունեն կլինիկական դրսևորումներ և չեն հանգեցրել ախտաբանական փոփոխությունների:

Նշված փոփոխություններով պայմանավորված՝ որոշման 14-րդ հոդվածով, վերջին շրջանում ոչ պիտանի ճանաչված քաղաքացիների թիվը նախորդ շրջանի համեմատ էականորեն նվազել է:

Ծառայության կողմից իրականացված մեկ այլ ուսումնասիրության արդյունքում պարզվել է, որ բժշկական կազմակերպությունների և ՀՀ առողջապահության նախարարության միջև կնքված՝ պետության կողմից երաշխավորված անվճար ու արտոնյալ պայմաններով բժշկական օգնության և սպասարկման ծառայությունների մատուցման մասին պայմանագրում սահմանված (օրենսդրությամբ և այլ իրավական ակտերով սահմանված չափորոշիչներում) կան անհամապատասխանություններ:

Ծառայությունն այդ վերլուծությունները փոխանցել է ՀՀ առողջապահության նախարարությանն ու «Արմեդ» էլեկտրոնային առողջապահական համակարգի օպերատորին:

ՀՀ առողջապահության նախարարության պետական առողջապահական գործակալությունում, պետական պատվերի շրջանակներում ծառայությունների կազմակերպման կարգեր մշակելու ուղղությամբ համապատասխան առաջարկներ են ներկայացվել Վարչապետին, ով տվյալ պետական լիազոր մարմիններին հանձնարարվել է միջոցներ ձեռնարկել օրենսդրական բացերը լրացնելու նպատակով:

Արդյունքում՝ Նախարարության կողմից ձևավորվել են առանձին աշխատանքային խմբեր՝ ներգրավելով փորձագետներ. 2023 թվականի դեկտեմբերի 27-ի դրությամբ հաստատվել են շուրջ 216 գործելակարգեր:

Էներգետիկայի ոլորտում, սահմանամերձ համայնքների բնակիչ-բաժանորդների համար սոցիալական աջակցության տրամադրման նպատակով փոխհատուցման ենթակա գումարների չափի և դրա հաշվարկի վերաբերյալ Ծառայություն հասցեագրված հանրագրերի հիման վրա իրականացվել են մշտադիտարկումներ:

Արդյունքում առաջարկվել է ՀՀ կառավարության 2014թ. դեկտեմբերի 18-ի N1444-Ն որոշման մեջ կատարել համապատասխան փոփոխություններ և ներդնել նոր մեխանիզմներ:

Նշված որոշման մեջ կատարվել են համապատասխան փոփոխություններ:

Կատարված փոփոխությունների շնորհիվ սոցիալական բնագավառում կարգավորվել են մի շարք խնդիրներ:

ՀՀ էկոնոմիկայի նախարարությունում գյուղատնտեսական պետական աջակցության ծրագրերի շրջանակներում, նախապատրաստման փուլում բավարար վերլուծության ապահովման, ռիսկերի նվազեցման և իրատեսական արդյունքներ ձևավորելու նպատակով, ինչպես նաև ծրագրերի իրականացման նպատակահարմարության գնահատման համար իրականացվել են ուսումնասիրություններ:

Ելնելով վեր հանված ընթացակարգային բացերի հետևանքով արձանագրված խնդիրներից՝ Ծառայության կողմից Նախարարությանն է առաջարկվել՝ մշակել և ծրագրում ներդնել մոնիթորինգի նոր մեխանիզմներ:

Բացի այդ, Հայաստանի Հանրապետության տարածքում թունաքիմիկատների (պեստիցիդների և ագրոքիմիկատների) ներմուծման, գրանցման և վաճառքի գործընթացներում վեր հանված մի շարք խնդիրներ հարթելու և հետագայում դրանք բացառելու նպատակով ՊՎԾ կողմից առաջարկություն է ներկայացվել փոփոխություններ կատարել ՀՀ-ում գրանցում ստացած թունաքիմիկատների անվանացանկի բովանդակություններում և վերանայել դրանց կիրարկման ժամկետները:

Համապատասխան օրենսդրական փոփոխությունների արդյունքում՝ ոլորտում վեր հանված մի շարք համակարգային խնդիրներ ստացել են իրենց լուծումները:

Այսպիսով՝ Ծառայությունը, բացի իր հիմնական գործառույթից՝ ՀՀ Վարչապետին Սահմանադրությամբ և օրենքներով վերապահված վերահսկողական լիազորությունների իրականացումից (պետական վերահսկողություն), պարբերաբար պետական կառավարման մաս հանդիսացող տարբեր գերատեսչությունների է ներկայացնում ինստիտուցիոնալ բարեփոխումների և գործող ընթացակարգերի լավարկման առաջարկներ, որոնց ներդրման արդյունքում հստակեցվում են սահմանված նորմատիվ կարգավորումները և ի սկզբանե կանխվում են հետագա հնարավոր խախտումներն ու պետական միջոցների չարաշահումները, որոնք կարող էին պայմանավորված լինել տվյալ իրավահարաբերությունների թերի լինելու հանգամանքով և օրենսդրական առկա բացերով:

ՀՀ ՊԵՏԱԿԱՆ ՎԵՐԱՀՍԿՈՂԱԿԱՆ ԾԱՌԱՅՈՒԹՅՈՒՆ