«Ֆրանսիական ռիթմեր». նորարարական ցուցադրություն՝ ի հիշատակ Շառլ Ազնավուրի
Աջակցիր «Ա1+»-ինՀՀ կրթության, գիտության, մշակույթի և սպորտի նախարարության աջակցությամբ «Տերյան» մշակութային կենտրոնն իրականացնում է «Ֆրանսիական ռիթմեր՝ նվիրված Ազնավուրի հիշատակին» մշակութային լայնամասշտաբ ծրագիրը։
Ծրագրի շրջանակում Ստրասբուրգ քաղաքում կայացել է ցուցադրություն՝ միավորելով հայ և ֆրանսիացի մասնագետների փորձը: Նախագծի նպատակն է ստեղծել միջմշակութային համագործակցության նոր հարթակ՝ ներկայացնելով հայկական մշակույթն ու ինքնատիպությունը ֆրանսիական արվեստի նրբերանգների համադրությամբ։ Ցուցադրությունն ունեցել է ինչպես ստատիկ, այնպես էլ ոչ ստատիկ ձևաչափ՝ ներգրավելով հանդիսատեսին նորարարական լուծումներով:
Միջոցառումների ընթացքում ցուցադրվել են հագուստի գործեր, որոնք արտացոլում են ֆրանսիական մշակութային առանձնահատկությունները և ժամանակակից հայկական ոճաբանությունը։
«Ֆրանսիական ռիթմեր՝ նվիրված Ազնավուրի հիշատակին» ծրագիրը խորհրդանշում է Շառլ Ազնավուրի արվեստի հնչյունային ու մշակութային ռիթմերը՝ որպես ոգեշնչման աղբյուր՝ միաժամանակ ընդգծելով ֆրանսիական մշակույթի ազդեցությունն ու ներդրումը համաշխարհային նորաձևության և արվեստի զարգացման մեջ։
Ծրագիրը կիրականացվի նաև Չեխիայում, Հայաստանում և Վրաստանում:
Նշենք, որ այս ծրագիրն ուղղված է նորարարական լուծումների խթանմանը նորաձևության ոլորտում, հայկական ժամանակակից նորաձևության միջազգային ճանաչմանը և տարածմանը, ինչպես նաև ստեղծագործական գործունեությամբ զբաղվող ինքնազբաղ արվեստագետների աջակցությանը։
ՀՀ ԿԳՄՍՆ ՀԱՍԱՐԱԿԱՅՆՈՒԹՅԱՆ ՀԵՏ ԿԱՊԵՐԻ ԵՎ ՏԵՂԵԿԱՏՎՈՒԹՅԱՆ ՎԱՐՉՈՒԹՅՈՒՆ
