Նախարարը շնորհավորել է շրջանավարտներին, նրանց մաղթել հաջողություն, վերելքներ ու հաղթանակներ կյանքի նոր փուլի մեկնարկին: Ժաննա Անդրեասյանը կարևորել է դպրոցում ստացած գիտելիքների դերը՝ ընդգծելով, որ դրանք հիմք են հետագա կրթության և անձնային զարգացման համար։

«Ամփոփում եք կյանքի շատ կարևոր փուլ և մուտք գործում հասուն կյանք, որտեղ ձեզ սպասվում են թե՛ հաջողություններ, թե՛ դժվարություններ։ Համոզված եմ՝ դպրոցում ստացած գիտելիքներն ու արժեքները կօգնեն հաղթահարելու այդ դժվարությունները և վստահորեն շարժվելու առաջ։ Սիրելի՛ շրջանավարտներ, այս օրը թող դառնա ձեր կյանքի ամենաուրախ և հիշարժան օրերից մեկը: Այն անցկացրեք այնպես, որ ամեն ակնթարթ դառնա լավագույն հիշողությունը»,- ասել է Ժաննա Անդրեասյանը և հաջողություն մաղթել ավարտական և ընդունելության քննություններում:

 

ԿԳՄՍ նախարարը նաև շնորհակալություն է հայտնել ուսուցիչներին և ուսումնական հաստատությունների աշխատակազմերին անմնացորդ աշխատանքի և նվիրումի համար։

 

Նշենք, որ համաձայն Կրթության կառավարման տեղակատվական համակարգում առկա տվյալների՝ 2024-2025 ուսումնական տարում 9-րդ դասարանն ավարտել է 39819, իսկ 12-րդ դասարանը՝ 21482 շրջանավարտ։