Տաքսու վարորդի հյուրասիրած «կոնֆետից» հետո երեխան տեղափոխվել է հիվանդանոց. SHAMSHYAN.COM
Աջակցիր «Ա1+»-ինԵրևանում 3-ամյա երեխա է տեղափոխվել հիվանդանոց՝ թունավորման ախտանշաններով. դեպքի մանրամասները պարզում են իրավապահները
2025թ․ ապրիլի 6-ին, կեսգիշերից հետո, Երևանում արձանագրվել է հնարավոր թունավորման դեպք, որի հետևանքով 3-ամյա աղջիկ է տեղափոխվել «Մուրացան» մանկական հիվանդանոց՝ քիմիական նյութով թունավորման նախնական ախտորոշմամբ։
Հիվանդանոցից ժամը 00:35-ի սահմաններում ահազանգ է ստացվել ՀՀ ՆԳՆ ոստիկանության Շենգավիթի բաժին։ Դեպքի վայր է մեկնել օպերատիվ խումբը՝ բաժնի պետ Արթուր Մկրտչյանի և տեղակալ Արծրուն Միքայելյանի գլխավորությամբ։
Երեխան հնարավոր է թունավորվել տաքսու մեջ
Ոստիկանության նախնական տվյալներով, 3-ամյա Արևիկ Հ.-ն, իր 30-ամյա մոր ուղեկցությամբ, կեսգիշերին մոտ նստել է «Opel» մակնիշի ավտոմեքենա, որն աշխատում է «Յանդեքս» տաքսի ծառայության համակարգում։ Տաքսու ընթացքի ժամանակ վարորդը երեխային հյուրասիրել է անհայտ ծագման հաբ՝ ներկայացնելով այն որպես կոնֆետ։
Հաբը օգտագործելուց հետո երեխան սկսում է վատ զգալ՝ ի հայտ են գալիս թուլություն, սրտխառնոց և թունավորման ախտանիշներ։ Ծնողները շտապ տեղափոխում են նրան «Մուրացան» հիվանդանոց, որտեղ բժիշկներին հաջողվում է կայունացնել նրա վիճակը։
Վարորդը խոստովանել է, կոնֆետները՝ անհայտ անձանցից
Ոստիկանության գործողությունների արդյունքում պարզվել է, որ վարորդը 48-ամյա Արմեն Դ․-ն է՝ Գեղարքունիքի մարզից։ Վերջինս հրավիրվել է ոստիկանություն, որտեղ խոստովանել է, որ հենց ինքն է հյուրասիրել «կոնֆետը» երեխային։ Նրա խոսքով՝ այդ կոնֆետները իրեն տվել են 2 օտարերկրացի ուղևորներ, որոնց ինքն անձամբ չի ճանաչել։
Ավտոմեքենայում ոստիկանները հայտնաբերել են նաև կոնֆետների մնացորդները, որոնք վերցվել են փորձաքննության։
Քննությունը շարունակվում է
Դեպքի առթիվ նյութեր են նախապատրաստվել և փոխանցվել ՀՀ Քննչական կոմիտե, Շենգավիթի քննչական բաժին։ Իրավապահները ձեռնարկում են անհրաժեշտ օպերատիվ-հետախուզական միջոցառումներ՝ օտարերկրացիների ինքնությունը պարզելու և նրանց հայտնաբերելու նպատակով։
Ծանուցում.
Ենթադրյալ հանցագործության մեջ կասկածվող անձը համարվում է անմեղ, քանի դեռ նրա մեղավորությունը ապացուցված չէ ՀՀ քրեական դատավարության օրենսգրքով սահմանված կարգով՝ օրինական ուժի մեջ մտած դատավճռով։
📌 Աղբյուր՝ shamshyan.com
