Մեկնարկել է «Երևան բալետ ֆեստ»-ը (տեսանյութ)
Աջակցիր «Ա1+»-ինԲորիս Էյֆմանի Սանկտ Պետերբուրգի ակադեմիական բալետի թատրոնը՝ Երևանում
«Երևան՝ բալետ ֆեստ». փառատոն, որն այս տարի ընդլայնում է ծավալներն ու աշխարհագրությունը: Տարվա ամենածավալուն մշակութային նախագիծն իրագործվում է Երևանի քաղաքապետարանի նախաձեռնությամբ: Երևանի բալետային փառատոնը մայրաքաղաքի մշակութային քաղաքականությունն ու առօրյան փոխելու հավակնոտ ծրագրերից է: «Դեռ նախորդ տարի այս օրերին Երևանի քաղաքապետարանի նախաձեռնությամբ մեկնարկած` Արամ Խաչատրյանի ծննդյան 120-ամյակին նվիրված առաջին բալետային փառատոնի հիմքում մայրաքաղաքը դասական բալետային արվեստին հաղորդակից դարձնելն էր: Ջանք ու եռանդ չենք խնայելու հանրային կյանքի վերափոխման, մարդկանց միջև փոխհարաբերությունների նոր ավանդույթներ ձևավորելու մեր հանձնառության իրականացման ճանապարհին»,-ընդգծել է Երևանի քաղաքապետ Տիգրան Ավինյանը: Բալետային օրերը Երևանում բացել է Բորիս Էյֆմանի Սանկտ Պետերբուրգի ակադեմիական բալետի թատրոնը: «Աննա Կարենինա», «Վարպետը և Մարգարիտան», «Ռոդեն, նրա հավերժական կուռքը». բեմում Էյֆմանի բոլոր ժամանակների լավագույն բեմադրությունների հատվածային ընտրանին էր: Նոր ձևաչափը փոխում է պատկերացումները մշակութային նախագծերի մասին: Բալետային օրերը Երևան են բերել նաև տասնյակ զբոսաշրջիկների: Փառատոնը կշարունակվի ևս երկու օր: Հունիսի 4-ին ասպարեզում կլինի Ալ. Սպենդիարյանի անվան օպերայի և բալետի ազգային ակադեմիական թատրոնը՝ «Կարապի լիճը» ներկայացմամբ: Հաջորդ օրը բեմում կլինի Թբիլիսիի թատրոնը՝ գալա ծրագրով: Երեկոների սկիզբը՝ ժամը 20:00-ին:
