Աղքատության աճը տարեվերջին կարող է հասնել 48 տոկոսի․ Արամ Սաֆարյան (տեսանյութ)
Աջակցիր «Ա1+»-ին2022 թվականին մենք գործ ունենք աննախադեպ և հետխորհրդային տարածքի համար ռեկորդային տնտեսական աճի ցուցանիշի հետ:
Եվրասիական փորձագիտական ակումբի 7-րդ տնտեսական հետազոտությունների արդյունքների հիման վրա այսօրվա քննարկմանը այս մասին նշեց Եվրասիական փորձագիտական ակումբի համակարգող Արամ Սաֆարյանը։
Սաֆարյանի խոսքով՝ տնտեսական ակտիվության ցուցանիշը առաջին կիսամյակում ավելացել է 10,5 տոկոսով։
«Սա շատ մեծ ցուցանիշ է»,-ընդգծեց Սաֆարյանը՝ հավելելով, որ արդյունքը անսպասելի էր շատերի համար։
Անցած տարեվերջին միջազգային կազմակերպությունների՝ այս տարվա համար կատարած կանխատեսումները շատ ավելի համեստ էին՝ ասում է Սաֆարյանը։
«Հայաստանի տնտեսական աճը, որ այդքան մեծ ցուցանիշ ունի, ամրապնդվում է համախառն ներքին արդյունքի աճի ցուցանիշով։ Անցած տարվա նույն ժամանակահատվածի համեմատ մեր ՀՆԱ-ն աճել է 8,5 տոկոսով։ Սա նույնպես շատ պատվավոր ու շատ մեծ թիվ է»,- պնդեց Արամ Սաֆարյանը։
Հայաստանի համար վերջին երեք տարվա ընթացքում ԵԱՏՄ տարածքի դերը գնալով մեծացել է։
Սաֆարյանի խոսքով՝ թեպետ տարվա վերջին արձանագրվելու է ծայրահեղ աղքատության թվի որոշակի կրճատում, բայց միաժամանակ Համաշխարհային բանկը և մյուս վարկանիշային կազմակերպություններն ահազանգում են՝ երկնիշ տնտեսական աճի կողքին լինելու է նաև երկնիշ աղքատության աճ։
«Եվ այս աղքատության աճը տարվա սկզբի 27 տոկոսի փոխարեն, տարվա վերջում կարող է հասնել 48 տոկոսի»,- ասաց Սաֆարյանը՝ հայտարարելով, որ դա պետք է ահազանգ լինի Հայաստանի իշխանություններին։
