Հանձնաժողովի որոշմամբ՝ ներկայացված առաջարկությունների ամփոփման արդյունքում առավելագույն կշռային գործակից հավաքած, մրցույթի պահանջներին բավարարող հայտատու և մրցույթի հաղթող է ճանաչվել «ՌԵՆՇԻՆ» ՍՊԸ-ն։

 

Ըստ ներկայացրած ներդրումային ծրագրի՝ ընկերությունը պարտավորվել է Օրբելի 23 հասցեում գտնվող գույքի օտարման նպատակով 5 տարիների ընթացքում վճարել 7 մլրդ 100 մլն ՀՀ դրամ (հավասարաչափ) և կատարել 71 մլրդ ՀՀ դրամի ներդրում՝ տարածքում հասարակական նշանակության կառույցի ստեղծման համար, որը ներառելու է բիզնես կենտրոն, առևտրահասարակական և ժամանցի տարածքներ, պուրակներ, հյուրանոցային համալիր, մանկական զարգացման կենտրոն և այլն։

 

Հիշեցնենք, որ խոսքը նախկին զինվորական հիվանդանոցի շենք-շինության մասին է։

 

Կառավարությունը 2020թ հուլիսի 30-ին որոշել էր  Տարածքային կառավարման եւ ենթակառուցվածքների նախարարության Պետական գույքի կառավարման կոմիտեին ամրացված` պետական սեփականություն հանդիսացող, Արաբկիր, Օրբելու փողոց 23 հասցեում գտնվող 9905.21 քառ. մետր ընդհանուր մակերեսով շենք-շինությունները եւ դրանց զբաղեցրած, օգտագործման ու սպասարկման համար հատկացված 3.302955 հեկտար մակերեսով եւ 0.004359հեկտար մակերեսով բաժնային սեփականություն հանդիսացող հողամասն օտարել մրցույթով: