Բացել լրահոսը Փակել լրահոսը
287930372_321450283511167_2641296640289511840_n
A A
Պաշտոնական

Հնդիկները ուզում են Գյումրիում թանգարան կառուցել

Շիրակի մարզպետ Նազելի Բաղդասարյանն այսօր ընդունել է Հայաստանի Հանրապետությունում Հնդկաստանի Հանրապետության արտակարգ և լիազոր դեսպան Կիշան Դան Դեվալին՝ հայտնում են մարզպետարանից։

Հանդիպման առանցքում Գյումրիում առանձին ցուցասրահ կառուցելու գաղափարն է եղել, որտեղ կցուցադրվեն Սարգիս Խաչատուրյանի կողմից հնդկական վիմափոր տաճարների՝ Աջանտայի քարանձավների որմնանկարների պատճենները, դրանք այժմ Հայաստանի ազգային պատկերասրահում են պահվում։

«Պարոն դեսպան, բարով եք եկել Շիրակի մարզ, ուրախ եմ ձեզ հանդիպելու և քննարկելու մեր համագործակցությանն առնչվող մի շարք ծրագրեր, մասնավորապես, ինձ համար ուրախալի է, որ պետք է խոսենք Գյումրիում նոր ցուցասրահ կառուցելու ծրագրի մասին, արդյունքում շատ հիանալի նախաձեռնություն կյանքի կկոչվի։ Վստահ եմ՝ մեր համագործակցությունը կունենա ցանկալի արդյունք և մենք ևս մեկ անգամ կվերահաստատենք մեր երկու երկրների կառավարությունների բարկամական կապերը»,- նշել է Շիրակի մարզպետը։

Դեսպան Դեվալին շնորհակալություն է հայտնել մարզպետին ջերմ ընդունելության համար․ «Տիկին մարզպետ, ուրախ եմ մեր հանդիպման համար, ուրախ եմ գտնվել մշակութային մայրքաղաք համարվող Գյումրիում և առավել ոգևորիչն այն է, որ քննարկում ենք այսպիսի կարևոր նախաձեռնություն։ Ինձ համար անչափ կարևոր է տեսնել ձեր պատրաստակամությունը»։

Հանդիպման ժամանակ կողմերը քննարկել են համագործակցության ամրապնդմանն ու խորացմանն ուղղված մի շարք հարցեր, մասնավորապես, կարևորելով տնտեսական համագործակցության խորացումն ու ապակենտրոնացված բիզնես գործակցությունը, անդրադարձ է կտարվել նաև հայ-հնդկական դիվանագիտական հարաբերությունների հաստատման 30-ամյա հոբելյանին ընդառաջ Գյումրիում միջոցառումներ անցկացնելու հարցը։ Կողմերը պատրաստակամություն են հայտնել գործուն քայլեր ձեռնարկել հետագա համագործակցության ընդլայնման, իրականացվող ծրագրերի շարունակականության ապահովման ուղղությամբ: