Էլեկտրաէներգիայի շուկայում արդեն նոր խաղացողներ կան (տեսանյութ)
Աջակցիր «Ա1+»-ինՓետրվարի 1-ից էլեկտրաէներգիայի մեծածախ շուկան աստիճանաբար ազատականացվում է՝ հնարավորություն ստեղծելով Հայաստանում ընտրություն կատարել՝ ումից և ինչ սակագնով ձեռք բերել էլեկտրաէներգիան։
«Այսօր արդեն անցումային սցենարով Հայաստանում գործում է էլեկտրաէներգետիկական ազատականացված շուկա»,-ասում է Հաշվարկային կենտրոնի տնօրեն Մեսրապ Մեսրոպյանը։
էլեկտրաէներգիայի առուվաճառքը նախորդ տասնամյակներում իրականացվում էր մեկ գնորդ-մեկ վաճառող սկզբունքով, և բոլորն անխտիր սպառած էլեկտրաէներգիայի համար վճարում էին միջինացված սակագին։
«Շուկան ազատականացնելով՝ մենք հրաժարվում ենք միջինացված սակագին հասկացությունից՝ այսինքն ամեն սպառող կվճարի և հնարավորություն կունենա շուկայից գնելու էլեկտրաէներգիան այն գնով, որով ինքը ազդեցություն ունի այդ սակագնի վրա»,- ասում է Մեսրոպյանը։
Շուկայի ազատականացմամբ վերանում է ոլորտում մենաշնորհը և էներգետիկ շուկա նոր խաղացողներ են մտնում։
«Այս պահի դրությամբ արդեն 2 գրանցված մատակարար ընկերություն ունենք շուկայում, լիցենզավորված մի քանիսն են, բայց որ արդեն մտել են շուկա և առևտուր են անում, երկուսն են»,- մանրամասնում է Հաշվարկային կենտրոնի տնօրենը։
Ոլորտի պատասխանատուները վստահեցնում են՝ ռեֆորմի նպատակն է, որ առաջին հերթին արդյունաբերական ձեռնարկություններն օգտվեն նոր մատակարարների առաջարկած ավելի էժան էլեկտրաէներգիա գնելու հնարավորությունից։
«Մայիսի 13-ից արդեն «Վեոլիա ջուր»-ը մեկ սպառման կետով արդեն իսկ միացել է էլեկտրաէներգիայի մեծածախ շուկային և այս գործընթացը կկրի շարունակական բնույթ, ինչ-որ ժամանակ հետո մենք մեր բոլոր սպառման կետերով արդեն կմիանանք մեծածախ շուկային»,- հավելում է Կարեն Գիշյանը։
ԱՄՆ Միջազգային զարգացման գործակալության Շուկայի ազատականացման և էլեկտրաէներգիայի առևտրի ծրագրի շրջանակներում կազմակերպված դասընթացին մասնակցող «Վեոլիա ջուր» ընկերության ներկայացուցիչն ասում է, որ շուկայի ազատականացումը լայն հնարավորություններ է ընձեռում։
Հանրային ծառայությունները կարգավորող հանձնաժողովից հավաստիացնում են՝ էլեկտրաէներգիայի ազատականցվող շուկան կարգավորումներին համապատասխան աշխատում է՝ նոր քայլեր կձեռնարկվեն 2023-ին՝ արդյունքների ամփոփումից հետո։
