Փարիզում Թուրքիայի գլխավոր հյուպատոսության վրա հարձակում է եղել․ «Ազատություն»
Աջակցիր «Ա1+»-ինՆախօրեին պայթուցիկ սարքով հարձակում է տեղի ունեցել Փարիզում Թուրքիայի գլխավոր հյուպատոսության վրա։ Թուրքական լրատվամիջոցների համաձայն, վնասվել են հյուպատոսարանի պատերը, ջարդվել են պատուհանները, տուժածներ չկան։
Տեղի ունեցածի համար մինչ այս պահը որևէ մեկը պատասխանատվություն չի ստանձնել։
Ֆրանսիական ոստիկանությունը փնտրում է հարձակման հեղինակներին:
Պաշտոնական Անկարան դատապարտել է միջադեպը և Ֆրանսիայի իշխանություններին կոչ արել՝ անհապաղ քայլեր ձեռնարկել մեղավորներին հայտնաբերելու և պատասխանատվության ենթարկելու համար։
Թուրքիայի արտգործնախարար Մևլութ Չավուշօղլուն այսօր հայտարարել է, որ կապ է հաստատել Ֆրանսիայի նախագահի խորհրդականի հետ և Անկարան հստակ քայլեր է ձեռնարկում այդ հարցով։
«Անկարայում Ֆրանսիայի դեսպան չլինելու պատճառով Թուրքիայի արտգործնախարարություն է կանչվել գործերի ժամանակավոր հավատարմատարը։ Մենք ֆրանսիացի դիվանագետին բաց ներկայացրել ենք մեր ակնկալիքները», - այսօր հայտարարել է Չավուշօղլուն։
Աղբյուր՝ «Ազատություն» ռադիոկայան
