Համապատասխան զննում չանցած գազաբալոններով մեքենաները չեն սպասարկվի լցակայաններում (տեսանյութ)

«Երբ որ մեքենան գնաց կայան,  ստուգվեց, իրեն ոչ միայն թղթային տարբերակով,  այլև էլեկտրոնային տարբերակով տվյալները լրացվում է։ Գազալցակայանի աշխատակիցը լիցքավորելուց առաջ համարը հավաքելով համակարգի մեջ տեսնում է մեքենան անցել է ստուգում,  թե չէ։ Եթե չի անցել,  չի լիցքավորում,  եթե անցել է կլիցքավորվի»։

Կառավարության նիստին ՏԿԵ նախարար Գնել Սանոսյանը ներկայացրեց Համապատասխան զննում չանցած գազաբալոններով մեքենաների գազալցակայաններում  սպասարկման նոր կարգը։

«Որոշման նախագծով նախատեսվում է ավտոտրանսպորտային միջոցների վրա գազաբալոնային սարքավորումների տեղադրման և պարբերական վկայագրման գործընթացի ծրագրային ապահովման նպատակով ավտոմատացված համակարգի ստեղծման համար անհրաժեշտ ֆինանսական միջոցների ապահովումը»,-ներկայացրեց նախագիծը։

Նախարարը հիշեցրեց, որ դեռևս 2021 թվականի դեկտեմբերին ընդունվել են երկու որոշումներ և կարգեր, որն էլ այս գործընթացի սկիզբ է դրել և հիմա այս գործընթացի մի մաս է կազմում էլեկտրոնային շտեմարանի առկայությունը։ Հայտարարվել է մրցույթ և շահող ընկերությունը 23 միլիոն 400 հազար դրամով հաղթող է ճանաչվել։ Նախարարի խոսքով՝ օգոստոսի մեկից համակարգը կսկսի գործել։

Նախարարն ընդգծեց, որ համակարգում այս պահին լուրջ խնդիրներ կան։ Տեղի են ունենում գազաբալոնային համակարգի խափանումներ, պայթյուններ։

Նոր նախագծի համաձայն Հայաստանում շահագործվող սեղմված գազով և հեղուկ գազով մեքենաների սարքավորումները պետք է ստուգվեն առնվազն երկու տարին մեկ անգամ, կան որոշ տեսակի բալոններ, որոնց դեպքում թույլատրվելու  է երեք տարին մեկ անգամ ստուգել։

Նախարարի խոսքով՝ շտեմարանը ղեկավարվելու է ՏԿԵ նախարարության կողմից, բայց մի շարք ընկերությունների թույլատրվելու է օգտվել այդ համակարգից։ Մասնավորապես կարող են օգտվել գազալցակայաններն ու տեսչական մարմինները։