ՀՀ պահանջներն ընդդեմ Ադրբեջանի, մեծ հաշվով, բավարարված են․ Եղիշե Կիրակոսյան (տեսանյութ)
Աջակցիր «Ա1+»-ինՀՀ կողմից ներկայացված պահանջներն ընդդեմ Ադրբեջանի, մեծ հաշվով, բավարարված են։
ՄԻԵԴ-ում ՀՀ ներկայացուցիչ Եղիշե Կիրակոսյանը այսօր մամուլի ասուլիսի ժամանակ այսպիսի արձանագրում արեց՝ ներկայացնելով միջազգային դատարանի կողմից «Հայաստանն ընդդեմ Ադրբեջանի» հայցով դեկտեմբերի 7-ին կայացրած վճիռը։
Կիրակոսյանի խոսքով՝ դատարանն արձանագրել է՝ հայրենադարձման վերաբերյալ հարցերը պետք է կանոնակարգվեն մարդասիրական իրավունքի կոնտեքստում՝ Ժնևյան կոնվենցիաների համաձայն․ կա հստակ պարտավորություն՝ անհապաղ վերադարձնել բոլոր գերեվարված անձանց։
Նրանց գերեվարվելը և ռասայական խտրականության ենթարկելը պայմանավորված է էթնիկ պատկանելիությամբ․ սա դատարանում նույնպես արձանագրվել է։
Դատարանի որոշմամբ՝ Ադրբեջանը պարտավորվել է ապահովել բոլոր գերեվարվածների իրավունքները, որոնք ամրագրված են ռասսայական խտրականության կոնվենցիայով, նաև՝ գերիները չպետք է ենթարկվեն անմարդկային և արժանապատվությունը նվաստացնող վերաբերմունքի։
ՄԱԿ-ի Արդարադատության միջազգային դատարանի մեկ այլ կարևոր արձանագրում էր ՝ ատելության խոսքի և ատելության քարոզի տարածումից ազատ մնալու իրավունքը․ ըստ դատարանի այն կարող է ունենալ անդառնալի հետևանքներ հատկապես երբ ատելության քարոզն իրականցվում է բարձրաստիճան պաշտոնյանների կողմից։
Եղիշե Կիրակոսյանը խոսեց նաև մշակութային օբյեկտների հետ կապված Հայաստանի ներկայացրած պահանջների մասին։ Նրա խոսքով ՄԱԿ-ի Արդարադատության միջազգային դատարանն այս հարցում ևս մեր պահանջները հիմնականում բավարարել է։