Հայհոյանքը քրեորեն պատժելի կլինի․ Վարդանյան (տեսանյութ)
Աջակցիր «Ա1+»-ինԱզգային ժողովի արտահերթ նիստում քննարկվում էր հայհոյանքը քրեորեն պատժելի դարձնելու վերաբերյալ որոշման նախագիծը։ «Իմ քայլի» պատգամավոր Վլադիմիր Վարդանյանը նշեց, որ այս նախագիծը բավականին հարցեր կարող է առաջացնել, սակայն ակնհայտ է խնդիրների առկայությունը մեր հասարակությունում։
«Տարիներ առաջ ՀՀ-ն ապաքրեականացրեց վիրավորանքի և զրպարտության համար քրեական պատասխանատվությունը և որպես արդյունավետ պաշտպանության միջոց նախատեսեց քաղաքացիաիրավական հարաբերությունների շրջանակներում դրա կարգավորումը։ Այդուհանդերձ, մենք պետք է վիրավորանքից տարբերենք հայհոյանքը և ծայրահեղ անպարկեշտ եղանակով անձի արժանապատվությունը վիրավորելը», - ասաց Վլադիմիր Վարդանյանը։
Նա նշեց, որ հայհոյանքը հայ հասարակությունում եղել է, կա և մնալու է պատժելի, այլ հարց է՝ պետությունը քաղաքացուն թողնելու է մենա՞կ, թե՞ հայհոյանքի արգելքը սահմանելու է օրենքով։
«Խնդիրն ավելի պրոբլեմատիկ է դարձել՝ հաշվի առնելով հեռավար եղանակով հայհոյանք պատճառելու հնարավորությունը։ Սոցիալական մեդիան, տեղեկատվության արագ փոխանակումը հեռավար հայհոյանքը դարձրել են ավելի վտանգավոր, քանի որ այն նաև հետագա քրեածին վարքագծի դրսևորման պատճառ է դառնում», - ասաց պատգամավորը։