Քարոզարշավից 20 օր առաջվա գույժերը, որ քարոզարշավի ընթացքում ծանր դեպքեր տեղի կունենան, բարեբախտաբար, չարդարացավ, -բանավեճի ընթացքում ասաց «Քաղաքացիական պայմանագիր» կուսակցության պատգամավորի թեկնածու Հովիկ Աղազարյանը։ Նա հույս հայտնեց, որ մինչև քարոզարշավի վերջն արտառոց դեպքեր տեղի չեն ունենա։

Նրա կարծիքով՝ այս քարոզարշավը տարբերվում է մյուսներից լարվածությամբ այն իմաստով, որ Հայաստանը 44-օրյա պատերազմից հետո հայտնվել է դժվար դրության մեջ․ «Ժողովրդի մեջ կա լսելու, հասկանալու կարիք, թե ինչու այսպես կամ ինչու այնպես։ Մյուս կողմից ռևանշիստական ուժերի գլուխ բարձրացնելն առիթից օգտվելով, որ իշխանությունը թափված է փողոցներում բավական է հավաքել ու ռևանշիստական նկրտումները կյանքի կոչել»։

Աշխարհում քիչ կլինի ժողովուրդ, ասաց Աղազարյանը, որ նման դժվարություններ ապրելով գնա ընտրությունները։ Նա ավելի լարված քարոզարշավ էր սպասում, սակայն իրավիճակն այժմ հանգիստ է։  

ՀՀ երրորդ նախագահ Սերժ Սարգսյանի հրապարակած ձայնագրության մասին հարցին, թե արդյոք այն դրական կամ բացասական ազդեց վարչապետի պաշտոնակատար Նիկոլ Փաշինյանի վարկանիշին, Հովիկ Աղազարյանը պատասխանեց, որ ընդդիմադիր ուժերի հրապարակած որևէ ձայնագրություն, որևէ փաստաթուղթ չի կարող ստվեր գցել Նիկոլ Փաշինյանի վարած քաղաքականության վրա։ 

Թե ինչպես է Աղազարյանը վերաբերում ընտրություններին մասնակցող դաշինքների առատությանը, նա նշեց, որ քաղաքական ուժեր և անհատներ են ու ցանկություն ունեն դրսևորվելու, դատապարտելի ոչինչ չկա․ «Ես վերջերս լսեցի Տիգրան Արզաքանցյանի հարցազրույցը, նույնիսկ իմ մեջ ներքին համակրանք առաջացավ նրա նկատմամբ։ Մենք ի՞նչ իմանանք, թե որտեղ է թաքնված հաջորդ Նիկոլ Փաշինյանը, լավ իմաստով, պետք է դրսևորվեն մարդիկ»։

Բանավեճի մյուս մասնակից, դիվանագետ, «Ազգային ժողովրդական բևեռ» կուսակցության աջակից Արա Պապյանը հակադարձեց, որ թեև անվտանգության հարցում քաղաքական ուժերի մեծամասնությունն ապավինում է Ռուսաստանին, սակայն այդ ճանապարհն արդեն սպառել է իրեն․ «Այսօր մեր և Ռուսաստանի շահերը հակոտնյա են։ Ռուսաստանի շահերից է բխում Ադրբեջանի և Թուրքիայի հետ հարաբերություններն ընդլայնել և դիմակայության մեջ լինել Արևմուտքի հետ, մեր շահերից դա չի բխում, որ Թուրքիան լինի Հարավային Կովկասում, մեզ բնավ ձեռնտու չէ հայտնվել Թուրքիայի գերիշխանության տակ, հետևաբար մեր միակ այլընտրանքը Արևմուտքի հետ համագործակցելն է»։

Նրա խոսքով՝ մեզ մոտ միակ կայացած կուսակցությունը վերջին տարիներին «Հայ հեղափոխական դաշնակցությունն» էր, սակայն այն դարձավ կոոպերատիվ և կցվեց ՀՀ երկրորդ նախագահ Ռոբերտ Քոչարյանին։

Արա Պապյանը նշեց, որ ընտրվելիք նոր խորհրդարանն էլ երկար կյանք չի ունենա և շուտով կարիք կլինեն նոր ընտրությունների։ Աղազարյանը պատասխանեց, որ հնարավոր տարբերակ է, սակայն հենց դա է խորհրդարանական համակարգի առավելությունը և եթե լիներ նախագահական համակարգ ու այս պատերազմական իրողությունները, նախագահական համակարգը իր մամլիչի տակ կպահեր բոլոր ընդվզումներն ու կճնշեր դրանք։

«Ընտրություններ կլինեն, անհրաժեշտություն կլինի, որ երկու տարի հետո նորից ընտրություններ լինեն, թող լինեն։ Գաղափարներն այստեղ են ծնվում, նոր քաղաքական գործիչներ են ի հայտ գալիս», - ասաց Հովիկ Աղազարյանը:

 

Մանրամասները՝ տեսանյութում