ՀԱՊԿ վարչապետի թեկնածուն հանրությանը հայտնի է «զինված խմբի» գործով

Ազգային ժողովի  արտահերթ ընտրություններին մասնակցող ուժերից մեկը Համահայկական ազգային պետականություն (ՀԱՊ) կուսակցությունն է։  Հանրությանը անհայտ  այս կուսակցության  կրճատ անվանումը համընկնում է  ՀԱՊԿ-ի՝  Հավաքական անվտանգության պայմանագրի կազմակերպության  հետ։  

Կուսակցությունը ՀՀ իրավաբանական անձանց պետական ռեգիստրում գրանցվել է ընդամենը մայիսի 21-ին։ 13.05.2021-թ. ժամը 12:30 րոպեին էլ, ըստ ՀԱՊԿ-ի,  տեղի է  ունեցել  հիմնադիր համաժողովը։

ԿԸՀ-ն  այսօր հրապարակել է ընտրությունների մասնակիցների ցուցակները, ներառյալ ՀԱՊԿ-ինը։ 

ՀԱՊ կուսակցությունը ընտրություններին մասնակցում է  պատգամավորի 82 թեկնածուով։  Ինչպես իրենք են հայտարարում՝ կուսակցությունը ազգային գաղափարների իրագործման տեսլականով մտնում է պայքարի հանուն մեր ազգի եւ հայրենիքի, հանուն մեր պետականության ամրապնդման եւ  գալիս են  մաքուր խղճով և մաքուր ձեռքերով ։

ՀԱՊԿ  վարչապետի թեկնածուն Արթուր Վալերիկի Վարդանյանն է, որը գլխավորում է նորաստեղծ  կուսակցությունը։   Ցուցակում նրան հաջորդում է անհատ ձեռներեց, «Սիլվա Հովհաննիսյան» խանութի  վաճառող Գոռ Մինասյանը։ Եռյակը եզրափակում է գիտաշխատող Մարիամ Մեծոյանը։

Ընդգրկված են նաեւ փականագործ, կահույքի վարպետ, հսկիչ վաճառողուհի, դիմահարդար, մարզիկ, ՀԿ նախագահ։ Պատգամավորի թեկնածուների  մոտ կեսը  գործազուրկ է կամ գոնե, ըստ ցուցակի, որեւէ տեղ չեն աշխատում։

Ի տարբերության կուսակցության՝  ղեկավար Արթուր Վարդանյանը շատ ավելի հայտնի է։

Նա Արցախյան պատերազմում զոհված, ՀՀ Արիության մեդալով  հետմահու պարգևատրված Վալերիկ Վարդանյանի որդին է, երկար տարիներ ապրել է  Իսպանիայում։

 Արթուր Վարդանյանը 2015թ Նորք-Մարաշում  ԱԱԾ-ի կողմից «վնասազերծված» զինված խմբավորման ղեկավարն է։  Ինը հոգանոց խումբը , եւ եւս 11 հոգի,  մեղադրվում են   ապօրինի զենք-զինամթերք պահելու,  բռնությամբ իշխանությունը զավթել ծրագրելու մեջ,  «ինչը ավարտին չի հասցվել նրանց կամքից անկախ հանգամանքներում, քանի որ հանցավոր համագործակցության մեջ ներգրավված անձինք բացահայտվել ու 2015թ. նոյեմբերի 25-ին վնասազերծվել են Հայաստանի Հանրապետության ազգային անվտանգության ծառայության աշխատակիցների կողմից»:

Ըստ մեղադրանքի՝ խումբը  նախատեսել է հարձակումներ գործել պետական շենքերի վրա, խոցել ՀՀ նախագահի օդանավը։

Արթուր Վարդանյանը ազատության մեջ է  1 մլն դրամ գրավի դիմաց, երբ կալանավորումից չորս տարի անց՝ 2019թ-ին փոխվեց նրա խափանման միջոցը։

Այս գործով մեղադրվում են նաեւ Պաշտպանության  նախկին փոխնախարար Վահան Շիրխանյանը, «Հայրենիք եւ պատիվ» կուսակցության նախագահ Գառնիկ  Մարգարյանը։  

Գործով դատավարությունը դեռ շարունակվում է, հաջորդ դատական նիստը  նշանակված է հունիսի 4-ին։

Ի դեպ, ինչպես տեղեկանում ենք Արթուր Վարդանյանի  ֆեյսբուքյան էջից,  վերջերս իր կուսակիցների հետ եղել է Սյունիքում, Գեղարքունիքում։     Մի գրառմամբ ՀԱՊԿ նախագահն  այսպիսի համոզմունք  է հայտնում․ «Ես չեմ պատրասվում կորցնել իմ հայրենիքը, իմ պետությունը, իմ ազատությունը և ոչ էլ իմ անկախությունը։ Եթե հայ ես, դու մենակ չես։ Մենք դուք եք, դուք մե՛նք ենք, իսկ բոլորս միասին մեկ հզոր ուժ ենք»։