«Բոլոր դեպքերում, հաշվի առնելով մեր հարեւանների կեցվածքը, շատ դեպքերում սադրիչ, չի բացառվում, որ

այնպիսի իրավիճակ ստեղծվի, որ նաեւ ուժային մեթոդով հարցը լուծվի»,-ասաց Աղազարյանը:

«Ա1₊»-ի հարցին, թե ի՞նչ ակնկալիքներ կան ՀԱՊԿ երկրների ԱԳ նախարարների խորհրդի այսօրվա նիստից, արդյոք ՀԱՊԿ-ը չի՞ հապաղում, Աղազարյանն արձագանքեց․

«Հապաղելու խնդիր չկա, նմանատիպ միջադեպերի դեպքում ամեն մի միջադեպն իր սահմանումը, իր գնահատականն ունի:

Սա սահմանային միջադեպ է, որը չի կարելի միանգամից բնութագրել որպես ռազմական գործողություն, հետեւաբար՝ ՀԱՊԿ-ը գործում է  իր կանոնադրության հիման վրա։

Նմանատիպ խնդիրները պետք է որոշակի քննարկման փուլ անցնեն, գնահատական տրվի, որից հետո արդեն իրականացվեն կոնկրետ գործողություններ: Հիմա այդ քննարկումների արդյունքում անկասկած ինչ-որ հետեւության կգան, կտան և՛ գնահատական, և՛ գործողությունների պլան երեւի կմշակվի»:

Աղազարյանը կարծում է՝ ՀԱՊԿ-ի ԱԳ նախարարները պետք է հայտարարությամբ հանդես գան, դիմեն Ադրբեջանի իշխանություններին, որ հնարավորինս կարճ ժամանակահատվածում ազատեն այդ տարածքները, որովհետև ամեն ինչ հստակ է։

Ըստ Աղազարյանի՝ Ադրբեջանի կողմից պայմաններ չեն դրվում, զիջումներ չի ակնկալվում․

«Միակ կեցվածքը, որ ունի Ադրբեջանը այս պահին, դա այն է, որ ըստ  իրենց քարտեզների, դա համարվում է իրենց տարածքի մի մասը: Բայց փաստորեն, համադրելով մեր ունեցած քարտեզները և 102-րդ ռազմաբազայում գտնվող

քարտեզները, հստակեցված է, որ դա հայկական տարածք է»։

Ինչ վերաբերում է սահմանային իրավիճակին, Աղազարյանն ասում է․ «Պարտությունից հետո մենք բավականին երկար նոր սահման ենք արձանագրել Հայաստանի եւ Ադրբեջանի միջեւ,

որը մինչ այդ կահավորված չի եղել անհրաժեշտ մակարդակով: Այդ հսկայական տարածքը այս ժամանակամիջոցում միգուցե հնարավոր չի եղել կահավորել, կամ միգուցե մենք թերացել ենք կամ չենք հասցրել, բայց դա չի նշանակում, որ Ադրբեջանը իրեն պետք է իրավունք վերապահի նմանատիպ քայլեր անելու:

«Ա1₊»-ի հարցին ի պատասխան Աղազարյանն անդրադարձավ նաև ներքաղաքական զարգացումներին, ողջունեց ՀԱԿ-ի որոշումը՝ մասնակցել արտահերթ խորհրդարանական ընտրություններին․

«Անկախ իմ գնահատականից, իմ վերաբերմունքից Լեւոն Տեր-Պետրոսյանի նկատմամբ, ես գտնում եմ, որ ՀԱԿ-ում կան բազմաթիվ քաղաքական գործիչներ, որոնք իրենց օրինակով, իրենց պահվածքով, գիտելիքներով կարող են օգտակար լինել մեր հայրենիքի կառուցմանը, զարգացմանը: Ես հաջողություն եմ ցանկանում իրենց: Իհարկե, ոչ

այնքան, որ մեզ հաղթեն: Այդպիսի մարդիկ պետք է լինեն խորհրդարանում, որոնք քաղաքական ու գաղափարական հենքով են շաղախված իրար հետ, ոչ թե ուրիշ հենքով: Այդպիսի մարդկանց հետ և՛ բանավիճելն է հեշտ, և՛  այս կամ

այն հարցի շուրջ բուռն քննարկումների արդյունքում կարող են գալ ինչ-որ եզրահանգման»։

Աղազարյանը համոզմունք ունի, որ Լևոն Տեր-Պետրոսյանի համար հոգեբանական հարված կլինի գործող իշխանության հաղթանակը․

«Հիմա, երբ անցնելով կորոնավիրուսի, պատերազմի ծանր իրողություններ, դրանից հետո եթե Նիկոլ Փաշինյանն իր թիմով արձանագրի հաջողություն ընտրություններում, ինչում ես համոզված եմ, ապա Լևոն Տեր-Պետրոսյանը այդ հոգեբանական հարվածին չի դիմանա, ինֆարկտ կստանա, որովհետև ինքը իրենից բացի ոչ ոքի չի տեսնում»: