Այս  խորհրդարանը  ամենաշատ մեդիատեռորի կիզակետում գտնվող  էր։

«Ա1+»-ի հետ զրույցում ամփոփելով արդեն իրավունքի ուժով արձակված յոթերորդ գումարման Ազգային ժողովի աշխատանքները, նշեց «Իմ քայլը» խմբակցության պատգամավոր Արուսյակ Ջուլհակյանը․

«Մեր ընտրվելու առաջին օրից մեզ վրա դրվեց երիտասարդ և անփորձ պատգամավորների պիտակը՝ չնայած այն բանին, որ մեր միայն մի մասն էր երիտասարդ, անփորձ շատ քչերն էին»։

Ջուլհակյանը նշեց, որ բարեփոխումներ անելու համար ունեցել են ընդամենը 2019 թվականը և այդ ընթացքում հասցրել են որոշ առումով իրագործել հեղափոխության  օրակարգը, որոշ բաներ էլ չեն հասցրել։

«Չենք հասցրել, ինձ համար ամենակարևորներից մեկը՝ անցումային արդարադատության բուն գործընթացը սկսելն է, որոշ գործիքներ հասցրինք իրականացնել , բայց դա մեր պատկերացրածի փոքր մասն էր։ Նպատակ ունեինք փաստահավաք խումբ ստեղծել, որը կուսումնասիրեր 1991 թվականից մինչև 2018 թվականն ընկած ժամանակահատվածում հետընտրական գործընթացները, ընտրությունների հնարավոր կեղծված լինելու հանգամանքները, ունեզրկումների դեպքերը, խաղաղ պայմաններում զինվորների մահերը և այլ նմանատիպ հարցեր, այդ նախագծի վրա երկար աշխատել էինք, այն պատրաստ էր, բայց սկսվեց պատերազմը և փոխվեցին առաջնահերթությունները»,-ասաց նա։

Ջուլհակյանն ասում է՝ այդ զեկույցի հիման վրա էլ պետք է տրվեր քաղաքական գնահատական նախորդ իշխանությունների աշխատանքին։

Այնուամենայնիվ, պատգամավորը չի համարում, որ  դատաիրավական բարեփոխումները ձախողել են, նրա խոսքով՝ այդ ոլորտում մի շարք կարևոր փաթեթներ են ընդունել։

Նա պնդում է, որ դատաիրավական համակարգը դիմադրել է ժողովրդին։

Ինչ վերաբերում է այս խորհրդարանի ձեռքբերումներին, պատգամավորն ասում է՝ ձեռքբերում է այն, որ ընդդիմադիր խմբակցությունների բավականին շատ նախագծեր են քննարկվել և ընդունվել, ինչը նախկինում չի եղել։

Պատգամավորն անդրադարձավ նաև Ռոբերտ Քոչարյանի քաղաքականություն վերադառնալու հանգամանքին։ Ըստ նրա՝  միայն քաղաքական գործընթացներից անտեղյակները կարող են պնդել, որ այս իշխանությունն է նրան գործոն դարձրել, որովհետև Ռոբերտ Քոչարյանը քաղաքանությունից երբեք էլ չի հեռացել․

«Մեր երկիրը և ժողովուրդը մի կերպ փրկվել են Քոչարյանից և նրա փրկության կարիքը չունեն, նրան սպասում է ձախողում»,- վստահ է Արուսյակ Ջուլհակյանը։