«Իշխանությունը թքած ունի գերիների խնդրի վրա։ Ով ինչ ուզում խոսում է այս թեմայով։ Բա իրենք էին ասում՝ գերիների հարցը նուրբ հարց է, պետք է ուշադիր լինել։ Մեկը ասում է՝ հենց հիմա 50 գերի կվերադարձվի, մեկը կանգնում, ասում է՝ դե, մենք ոչ թե հավաստիացրել ենք, այլ հույս ենք հայտնել։ Բա դա հույս հայտնելո՞ւ թեմա է», - ասուլիսի ընթացքում ասաց ԱԺ պատգամավոր Գևորգ Պետրոսյանը։

Մի քանի օր առաջ  Բաքվից Երեւան ինքնաթիռը վերադարձավ առանց գերիների։

Նրա խոսքով՝ ծնողները հույսով եկել, սպասել էին իրենց երեխաների գալուստին, բայց ինչ-որ մեկը գալիս, ասում է՝ ինքնաթիռը դատարկ է եկել։ Երբ վարչապետի խոսնակ Մանե Գևորգյանից էլ լրագրողները դրսում մեկնաբանություն են ուզում, փախչում է․

«Աղջիկ ջան, քեզ չեն եկել, փողոցում ասում՝ գեղեցկուհի, Դուք քանի՞ տարեկան եք, որ դու վազես, փախնես։ Ասում են՝ մեկնաբանություն տուր, այն, որ կանգնել, ասել ես՝ 50 ռազմագերի է վերադարձվում, բա ո՞ւր են այդ ռազմագերիները, փախնում, նստում է ծառայողական ավտոմեքենան», - ասաց նա։

Պաշտպանության նախարարության բարձրաստիճան պաշտոնյաներն էլ, նրա խոսքով, պատերի վրայից թռչելով փախչում էին աշխատանքի վայրից, որ չհանդիպեին քաղաքացիների, որդեկորույս մայրերի, գերեվարվածների ծնողների հետ։

«Որ Պաշտպանության նախարարությունը դառնում է վազորդ, իր աշխատավայրից դասալքությամբ է զբաղվում, մենք ումի՞ց ինչ ուզենք։ Սենց բան տեսե՞լ եք, որ պաշտպանության նախարարության սպան պատնեշի վրայով փախչի իր գործի տեղից։ Ում մարմնի կառուցվածքն էլ թույլ չի տալիս թռնի, ուղղաթիռ է կանչում», - ասաց Գևորգ Պետրոսյանը։

Բացի դրանից, այժմ ոչ մի հրամանատար չկա, որի նկատմամբ օրինական քրեական հետապնդում է հարուցվել՝ պատերազմը տանուլ տալու համար․

«Այսինքն, բոլոր հրամանատարները, և Նիկոլն էլ որպես չկայացած գերագույն հրամանատար, մաքուր էին, արդար էին, միայն զինվո՞րն էր մեղավոր, որ գնաց, զոհվեց»։

Պատգամավորը նշեց՝ Նիկոլ Փաշինյանն իր խոսնակների միջոցով ուզում է անընդհատ հասարակության ուղեղին կաթեցնել, որ այս խաղաղության համար մենք իրեն ենք պարտական․

«Նիկո՛լ Փաշինյան, դու այս խաղաղության հետ այնքան կապ ունես, որքան Մաուգլին՝ ձեր թավշյա հեղափոխության», - ասաց նա։