Նիկոլ Փաշինյանի հայտարարությունը փաստ չէ, որ տեղի են ունենալու արտահերթ խորհրդարանական ընտրություններ։ Այս մասին Բաղրամյան պողոտայում հրավիրված ասուլիսում հայտարարեց Հայրենիքի փրկության շարժման համակարգող Իշխան Սաղաթելյանը, պնդելով, որ ունեն բավարար հիմքեր կասկածելու, որ ընտրություններ չեն լինելու։

Իշխան Սաղաթելյանը վերահաստատեց իրենց մոտեցումը՝ արտահերթ ընտրությունները իրավիճակից դուրս գալու ելք են, բայց Նիկոլ Փաշինյանի վարչապետի ժամանակավոր պաշտոնակատար լինելու պարագայում կա մեծ վտանգ, որ այդ ընտրությունները կեղծվելու են  և չեն լինելու մրցակցային, հավասար պայմաններում։

Շարժման համակարգողն ասաց, որ իրենց բողոքի ակցիաները շարունակական են լինելու, հնարավոր է միայն մարտավարական որոշ փոփոխություններ։

Սաղաթելյանն ասաց՝ իրենց թեկնածուն Վազգեն Մանուկյանն է, բայց եթե լինի այլ չեզոք թեկնածու, իրենք դեմ չեն լինի։

Ինչ վերաբերում է ԲՀԿ-ի որոշմանը, Սաղաթելյանն ասում է, որ շարժման ներսում ունեն հստակ կոնսենսուս, որ Նիկոլ Փաշինյանը պետք է հեռանա, բայց կան կուսակցություններ, որոնք գտնում են, որ ճանապարհը արտահերթ ընտրություններն են, կան կուսակցություններ, որ այդ տեսակետը չեն կիսում․

«Դաշնակցությունը մինչև վերջ պայքարելու է իր հայտարարած օրակարգի համար, եթե այսքան պայքարից հետո անկախ մեր կամքից տեղի ունենան արտահերթ ընտրություններ, այդ ժամանակ Դաշնակցությունը կքննարկի մասնակցության ձևաչափը, օրակարգը կամ կորոշի՝ մասնակցում են թե ոչ»։

Սաղաթելյանը պնդեց՝ Հայրենիքի փրկության շարժումը կարող է պայքարը լիարժեք շարունակել։