Հանրապետության հրապարակից վարչապետ Նիկոլ Փաշինյանն ու նրա աջակիցները քայլերթով հասել էին Շենգավիթ վարչական շրջան: 

 

Նիկոլ Փաշինյանը այնտեղ կանգնեցրեց քայլերթը` ասելով, որ օրվա իրենց առաքելությունն իրականացրին` հրապարակում արձանագրելով ժողովրդի դիրքորոշումը:

 

Նա նշեց, որ ՀՀ նախագահ Արմեն Սարգսյանը պիտի ստորագրի ԶՈՒ ԳՇ պետ Օնիկ Գասպարյանին ազատելու հրամանագիրը, կամ վերջինս պետք է հեռանալու դիմում գրի:

 

«Այս պահից սկսած, մենք մեր ակցիաները դադարեցնում ենք և առաջարկում ենք, որ մեր ընդդիմադիր գործընկերները նույնպես դադարեցնեն: Քաղաքական ուժերի ներկայացուցիչներին հրավիրում ենք հետագա անելիքների վերաբերյալ քննարկումների: Այդ անելիքների վերաբերյալ որոշումները, իհարկե, պետք է կայացվեն` հաշվի նստելով ժողովրդի հետ», - ասաց վարչապետը: 

 

Երթի ավարտից հետո, Փաշինյանի խոսքով գնալու է Կառավարություն և մասնակցելու է մի քանի խորհրդակցությունների ու քննարկումների. 

 

«Առաջիկայում մեր կարգախոսը հետևյալն է` «Ո՛չ թավիշին»:

Բոլորն իրենց հնարավորություններն ստացան. ով օգտագործեց իր հնարավորությունը` օգտագործեց, ով չօգտագործեց` ժողովրդի կամքը պիտի կատարվի», - ասաց նա:

 

Հիշեցնենք, որ ընդդիմությունը փակել է Բաղրամյան պողոտան` հայտարարելով,որ չի հեռանալու, մինչև Նիկոլ Փաշինյանը հրաժարական չտա։