Բացել լրահոսը Փակել լրահոսը
A A
Տեսանյութեր Մշակույթ

Յուրի Դավթյանի հիշատակին (տեսանյութ)

Մեկ տարի առաջ կյանքից հեռացավ դիրիժոր, ՀՀ ժողովրդական արտիստ, պրոֆեսոր Յուրի Դավթյանը։ «Երաժշտությունն ինձ համար ճակատագիր դարձավ այն օրը, երբ ռադիոյով լսեցի Ավետ Գաբրիելյանի ջութակի նվագը»,- ասում էր Յուրի Դավթյանը:

Ուսանեց Չայկովսկու անվան երաժշտական դպրոցի ջութակի բաժնում, հետո ավարտեց Կոմիտասի անվան պետական կոնսերվատորիայի նվագախմբային դիրիժորության և թեորիայի բաժինները և այն, ինչ սովորեց ժամանակին իր ուսուցիչներ Կոնստանտին Սարաջևից, Միքայել Թավրիզյանից ու Գեորգի Տիգրանովից, փոխանցեց իր սաներին:

Յուրի Դավթյանը ղեկավարել է Խորհրդային երկրի ամենահեղինակավոր նվագախմբերը՝ Մոսկվայի Մեծ թատրոնի նվագախումբը, Սանկտ Պետերբուրգի Մարինյան նվագախումբը, Սարատովի օպերայի և բալետի թատրոնի նվագախումբը։ Երկար տարիներ եղել է Երևանի Ալեքսանդր Սպենդիարյանի անվան օպերային թատրոնի գլխավոր դիրիժորը, ղեկավարել է ՀՀ հեռուստառադիոպետկոմի սիմֆոնիկ նվագախումբը և Հակոբ Պարոնյանի անվան երաժշտական կոմեդիայի պետական թատրոնի նվագախումբը:

Դիրիժորի սան Սերգեյ Սմբատյանը և Հայաստանի պետական սիմֆոնիկ նվագախումբը սիրելի մանկավարժի 90-ամյակի առիթով հոբելյանական համերգ էին կազմակերպել, որից առաջ «Ա1+»-ը զրուցել էր Յուրի Դավթյանի հետ։