Գերիների հարազատները բացել են Գյումրի-Երեւան ճանապարհը՝ ԱԱԾ տնօրենի հետ հանդիպելու պայմանով (տեսանյութ)

Այսօր կեսօրից անհետ կորածների ու գերեվարվածների հարազատները փակել են Գյումրի- Երեւան, Գյումրի -Արմավիր ճանապարհները:

Բողոքի ակցիայի մասնակիցները նշել են, որ փակված ճանապարհները չեն բացվի այնքան ժամանակ, մինչեւ հստակ տեղեկություն չունենան իրենց երեխաների մասին եւ իրենց ձայնը հասնի համապատասխան ատյաններ:

Քիչ առաջ հայտնի դարձավ, որ գերեվարված զինծառայողների ծնողներն ու հարազատները բանակցությունների արդյունքում որոշեցին բացել Գյումրի-Երևան ճանապարհը:

Շիրակի մարզպետարանի տեղեկատվության և հասարակայնության հետ կապերի բաժնի պետի ժամանակավոր պաշտոնակատար Արաքսյա Կիրակոսյանը  փոխանցեց, որ  Շիրակի մարզպետը և  ՀՀ ոստիկանության Շիրակի մարզային վարչության պետը տեղում հանդիպել են գերեվարվածների հարազատների հետ։

Արդյունքում պայմանավորվածություն է ձեռք բերվել, որ վաղը  հարազատների  հետ կհանդիպի  ՀՀ ԱԱԾ տնօրենը: Ճանապարհի  փակ լինելու պատճառով ավտոմայրուղում   մեքենաների մի քանի կիլոմետր ձգվող խցանումներ են առաջացել։