Կվերանայվեն տուգանքների չափերը (տեսանյութ)
Աջակցիր «Ա1+»-ինՊատգամավորներ Արտակ Մանուկյանն ու Բաբկեն Թունյանն առաջարկում են փոփոխություններ կատարել «Բանկային ավանդների ներգրավման մասին» օրենքում: Նպատակը սպառողների շահերի պաշտպանությունն ու խախտումների կանխարգելումն է:
Նախատեսվում է խստացնել սպառողներին վարկավորման կամ ավանդների ներգրավման գործառույթի իրականացման համար նախատեսված կարգավորումները խախտելու համար սահմանված տուգանքների չափերը: Գործող օրենքներով սահմանված են տուգանքի հետեւյալ չափերը` առաջին խախտման համար` 100 հազար, երկրորդի համար` 200 հազար, իսկ երեք եւ ավելի խախտման համար` 500 հազար ՀՀ դրամ: Տուգանքն օրինախախտ բանկից գանձելու է Կենտրոնական բանկը՝ հօգուտ պետական բյուջեի:
Որոշ պատգամավորներ անարդար համարեցին հօգուտ պետբյուջեի բռնագանձումը՝ առաջարկելով տուգանքի մի մասը փոխանցել սպառողին: Պատգամավոր Սերգեյ Բագրատյանի կարծիքով՝ առաջարկվող փոփոխությունները ոչինչ չեն տալու սպառողին, կա նաեւ վարկերի տոկոսադրույքների բարձրացման վտանգ: Նա առաջարկեց շրջանառությունից հանել փաթեթը: Այս տեսակետին չհամաձայնեցին հեղինակները՝ պնդելով, որ այն միտված է պաշտպանելու բացառապես սպառողների շահերը, բացի այդ՝ այն չի կարող ազդել վարկերի տոկոսադրույքների փոփոխման վրա:
ԱԺ ֆինանսավարկային եւ բյուջետային հարցերի մշտական հանձնաժողովի փետրվարի 5-ի հերթական նիստում քննարկված օրենքի նախագիծը, ըստ ԿԲ նախագահի տեղակալ Ներսես Երիցյանի, ընդունվելուց հետո ուժի մեջ կմտնի ընթացիկ տարվա հուլիսի 1-ից:
